Dia 15 desèmber último, Organisashon Mundial Meteorológiko (OMM) durante di un seremonia virtual a anunsiá ku e “Weather App” di Meteo a sali na di dos lugá huntu ku Trinidat pa app di wer pa paisnan den desaroyo.
Den último añanan hopi “App” di wer ta disponibel ku kobertura mundial, regional i lokal. Nan ta wòrdu desaroyá tantu pa sektor priva y públiko manera servisionan Meteorológiko. “App” tokante di wer por duna informashon di wer ekstremo rápido na e usuarionan hasiendo nan un instrumento vital pa asina por tuma desishon den situashonnan krusial. Sinembargo e variashon grandi den e funshonalidat, kalidat i uso di e diferente “app” por redusí e konfiansa di e usuario den informashon di wer via e medio aki.
Den e kuadro aki OMM a krea e kompetensia pa rekonosé i premia “App” tokante wer ku ta halsa konfiansa di públiko general. Ademas pa stimulá desaroyo kontinuo di “app” tokante wer. Komo parti di e selebrashon di 70 aniversario di OMM a organisa e kompetensia pa promé biaha na 2020. Na fin di ougùstùs OMM a risibí un total di 118 partisipante Afrika (12), Asia (30) Oropa (43), Nort i Sentro Amérika (19) i Sur Amérika (4) i islanan pasífiko (10) for di sektor priva (41%), sektor públiko (38%) i otro instansianan (21%). Un hurado internashonal (13 persona) konsistí di ekspertonan riba tereno di wer, klima, IT, komunikashon i sensia sosial a premia 18 partisipante i a rekonosé 14 partisipante den tres kategoria.
Den e kategoria di inovashon i promoshon di uso di informashon di wer i klima AccuWeather (Merka), Meteo France (Fransia) i Yr (Noruega) a bai ku e premio máksimo. Den e grupo pa paisnan den desaroyo AirQo (Uganda) i Servisio Meteorológiko di Fiji a bai ku e premio. E Curaçao Weather App a wòrdu rekonosé den e kategoria aki huntu ku meteo di Trinidad.
Mirando ku Meteo ta un organisashon públiko i apesar di su grandura por a kompetí i wòrdu rekonosé na nivel mundial pa su forma inovativo, desaroyá e “weather app”. Esaki ta mustra ku dedikashon di e empleadonan di Meteo i trabou den ekipo huntu ku desaroyando e “weather app” ku por logra trabou di nivel mundial.
Di e manera aki hasiendo uso di teknologia inteligente, Meteo lo sigui hasi su esfuerso konforme tratadonan internashonal, pa vigilá pa wer ekstremo, i
otro peligernan di naturalesa pa por protehá bida i propiedat di e pueblo di Kòrsou.
Minister Jesus-Leito ta sumamente kontentu ku e rekonosimentu ku Meteo a risibí di OMM i lo sigui apoyá Meteo pa duna nos komunidat informashon di wer na un nivel ku gobièrnu ta rekerí.
