Klaridat riba e situashon di kompania ENNIA mester bini kla dilanti. Gobièrnu ketu bai ta buska pa tira falta riba otro of buska e problema schuif riba otro.
Nos ta mira ku minister di Finansas ta bai reuní ku sindikatonan riba e situashon di ENNIA pero ainda no tin klaridat kiko ta e desishon final. Gobièrnu ta di splet den dos opinion dor ku minister presidente ta bisa den prensa i parlamento ku ta bai “afwikkeling” i minister di finansas ta bisa na e trahadonan i den media ku e ENNIA Leven ta sigui.
Esaki ta demostrá un biaha mas falta di koherensia i direkshon di gobièrnu. E realidat di e situashon tin impakto riba bida di hende i nos finansas publiko mirando ku Gobièrnu kier hinka 30 mion di komunidat pa aña den ENNIA.
Nos di MAN-PIN ta sumamente preokupa mirando ku tin diferente posibildat pa duna kontinuashon i seguridat na penshun di e penshonado pero nada konkreto.
Si nos ta kontentu ku alomenos minister di finansas a kuminsa papia di bai den e direkshon ku MAN-PIN a trese for di inisio kual ta “doorstart” kontinuashon di e kompania ENNIA. Kual ta sigurá pago di penshun di e penshonado, futuro penshonado i tambe trabou di mas di 100 mama i tata di famia ku ta laborá na ENNIA. Pueblo tin mas ku 4 luna ta warda Gobièrnu riba solushon pa e problematika grandi di ENNIA. Gobièrnu kada bes di kosnnan grandi ta hunga e wega di tapa kara i no ta enfrenta e realidat.
MAN-PIN ta urgi Gobièrnu i minister di finansa pa duna transparensia i klaridat di e kontinuashon di ENNIA i asina trese trankilidat pa e pueblo ku ta wardando riba un desishon.
