Pa hopi tempu sindikatonan den enseñansa ta pidi pa atendé ku posishon hurídiko i
struktura salarial di nan miembronan. Ta un realidat ku profeshon di dosentenan ta birando
ménos atraktivo i kantidat di dosente ta bandoná e profeshon òf ta emigrá pa Boneiru,
Aruba òf Hulanda. E situashon aki ta preokupante pa futuro di nos enseñansa i di nos pais.
Mester alsa e problema aki riba nivel di polítika (nivel nashonal) i buta interes di pais na
promé lugá pa nos por garantisá futuro di nos enseñansa.
Diferente biaha den Parlamento a pidi Ministernan konserní pa adaptá tambe salarionan di
personal no dosentenan i asistentenan di dosente, ku ta bou di suèldu mínimo stipulá pa
gobièrnu. E salarionan di dosente i no dosente no ta reflehá e importansia ni tampoko e
peso di responsabilidat di e trabou ku e personal aki ta hasi.
Lider di MAN-PIN, Giselle Mc William ta kere ku bon boluntat i pone nanishinan den mesun
direkshon, mester por logra remediá e situashon aki. “Mester hasi un revishon profundo di e
struktura salarial i posishon hurídiko di trahadónan den enseñansa pa salbaguardiá ku e
profeshonalnan aki ta keda den e bunita sektor aki i alabes ta hasi e sektor atraktivo atrobe
pa hóbennan skohe pa un profeshon den enseñansa.”
Sindikato Doen den su komunikado a hasi un petishon pa instalá un komishon di
Ministerionan di Enseñansa, BPD i Finansa ku segun Mc William ta un paso den e bon
direkshon, pero e ta sugerí pa alabes inkorporá profeshonalnan eksterno riba tereno di
enseñansa i struktura salarial den e komishon aki. MAN-PIN ta úrgi Minister di EnseñansaT
pa hasi esaki un prioridat pa asina tur hende haña un mihó bista kon mester bai atendé ku e
problema di salario den enseñansa i alabes haña un kuadro finansiero real pa huntu por
yega un sistema di salario hustu i atraktivo ku lo ta na benefisio di futuro di nos enseñansa i
nos pais.
Mester prioritisá revishon di struktura salarial di dosentenan i no dosentenan
