Bo tin un outo òf motosaikel? E ora ei bo tin ku paga impuesto di vehíkulo di motor pa 2021. For di kuminsamentu di yanüari 2021 bo ta haña un karta, e asina yama ‘aanslagbiljet’, tokante esaki na kas. Den e karta ei tin pará kuantu bo tin ku paga i ki dia bo tin ku paga.
Responsabilidat pa e plachinan di number
Bo ta responsabel pa e plachinan di number ku bo a haña na Entidat Públiko Boneiru (EPB) i si tin kambio informá EPB su departamento di Finansa. Nos ta rekomendá bo pa entregá bo plachi di number si bo bende bo outo i bo no mester di e plachi mas òf si bo vehíkulo motorisá no ta funshonando. Esaki ta evitá ku bo ta sigui paga impuesto.
Redukshon
Si bo a entrega bo plachi di number na Finansa òf a interkambiá (bende) bo plachi i a notifiká esaki na Finansa den luna di desèmber 2020 lo bo bai haña un ‘aanslag’. E ‘aanslag’ ta bini ku un redukshon. Ta manda e ‘aanslag’ no mas tarda ku fin di yanüari 2021.
Paga den dos biaha
Bo por paga e suma den dos parti si bo ta deseá esei. Esei ta bai di e siguiente manera:
- E promé mitar bo ta paga promé ku 1 di aprel 2021.
- E di dos mitar bo ta paga promé ku 1 di yüli 2021.
Dia 1 di aprel bo no a paga nada ainda? E ora ei bo mester paga henter e suma dia 2 di aprel 2021. Den e karta ku bo ta bai risibí di nos tin mas informashon tokante pagamentu den dos parti.
Paga mas promé
Bo por paga impuesto di vehíkulo di motor ya kaba for di promé ku bo a risibí e karta. Bo por paga via internèt òf na lokèt di bo banko. Na ‘referensia di pago – betaalkenmerk’ bo ta nota bo number di CRIB/01lèter di base21number ku tin riba bo plachi di number. Ehèmpel: 123456789/01B21B1234.
Si bo skohe pa paga e impuesto di vehíkulo di motor for di promé ku bo a risibí e karta, tene na kuenta ku bo ta djis warda e karta huntu ku bo komprobante di pago ya bo no tin ku hasi e pago atrobe.
Bo pago bo por transferí na:
R.B.C.: 8400000180872997 – RBTTBQBN
ORCO BANK: 7601000195 – ORBABQBN
M.C.B.: 402.917.08 – MCBKBQBN
B.D.C.: 30638802 – BDCCBQBN
Bo estado di kuenta di banko ta e prueba ku bo a paga.
Den e skema aki bou bo por mira kuantu bo tin ku paga. Wak e tipo di kombustibel i e lèter riba bo plachi di number.
| Number di vehíkulo di motor | Plachi di | ||||
| Kombustibel | (lèter) | Base | Henter aña | Mitar aña | number |
| Gasolin | B òf V | B | USD 190.00 | USD 95.00 | USD 8.40 |
| Disel | B òf V | D | USD 838.00 | USD 419.00 | USD 8.40 |
| Gasolin | TX òf AB | C | USD 137.00 | USD 68.50 | USD 8.40 |
| Disel | TX òf AB | E | USD 209.00 | USD 104.50 | USD 8.40 |
| Gasolin | MF | A | USD 137.00 | USD 68.50 | USD 5.60 |
| Disel | Z | G | USD 1,257.00 | USD 628.50 | USD 5.60 |
