Door di crea un sistema di educacion cultural tanto na scolnan como pafo di enseñansa
Hunto nos mester sigui avansa y eleva e balor y aprecio pa nos cultura, arte y historia door di incorpore den nos enseñansa y na mes momento percura cu pafo di scol tambe e ta accesibel pa un y tur den nos comunidad”, Parlamentario Shailiny Tromp-Lee a duna di conoce.
Den Programa di Gobernacion 2021-2025 di Partido MEP, nos a percura pa duna e punto aki su debido atencion. Como meta nos a stipula pa adapta y amplia nos programanan curicular cu ta tene cuenta cu e desaroyo holistico di e ser humano pa nan por ta bon ciudadano Arubano y di mundo.
Den e 4 añanan nos dilanti nos lo desaroya programanan curicular cu ta stimula e.o. identidad nacional, cultura, idioma, salud, matematica, historia y derecho estatal den enseñansa primario, secundario y preuniverisitario. Sigur e parti di educacion cultural y di nos historia na scol ta puntonan cu semper mi a para pa nan”.
Tur mucha, hoben y adulto tin e derecho di disfruta di arte y cultura como parti di nan desaroyo humano. MEP su meta ta pa sigui engrandece e desaroyo di arte y actividadnan cultural pa henter pueblo di Aruba por biba y experiencia cultura.
Participacion ta e miho manera pa conscientisa y educa nos comunidad di e balor grandi di su herencia cultural. P’esey mes ta sumamente importante y necesario pa incorpora nan den nos programanan curicular di scol. E ta haya un aspecto mas concreto y obligatorio y no ta depende mas di e posibilidad y interes di cada hogar.
Parlamentario Tromp-Lee a remarca cu cultura y arte ta haci cu nos educacion ta bay ta mas bibo y concreto. Nan lo inspira, stimula, motiva y brinda nos studiantenan experiencianan inolvidabel. Nan ta forma pilarnan importante pa crea ciudadanonan cu pensamento critico y cu un identidad fuerte. Nos lo crea entre otro futuro profesionalnan cu ta ‘think outside the box’, ta creativo, y no tin miedo pa expresa nan opinión y splica esaki. Mi ta convenci cu cultura ta e herment pa yuda construi un sociedad resiliente pa surpasa e consecuencia di e pandemia aki y cualkier otro reto cu bin riba nos caminda.
Pa realisa e puntonan importante aki MEP lo percura pa institui un Comision Nacional pa Educacion Cultural, pa den colaboracion cu Departamento di Enseñansa, traha riba un sistema di educacion cultural tanto na scolnan como pafo di enseñansa.
Pa loke ta trata ampliacion di e curiculo escolar, nos tur conoce e situacion di scarsedad di empleado na afdeling di Curiculo na Departamento di Enseñansa. P’esey mes a incorpora den nos Programa di Gobernacion pa pecura pa amplia e ekipo di profesionalnan cu ta traha riba curiculo na e mesun cantidad cu e tabata na 2019, incluyendo profesional nan den “instructional design”. Esaki ta sumamente necesario si enberdad kier realisa e meta aki riba menciona. Otro aspecto importante ta e alocacion di fondonan necesario pa despues cu e contenido keda stipula enberdad por produci e materialnan pa scol.
Pa loke ta trata un sistema di educacion cultural pafo di scol cu ta accesibel pa un y tur (financieramente y cua distancia) mi ta kere cu nos mester crea e mesun formato cu tabata existi tempo di Fundacion Desaroyo Educativo Comunitario (FDEC). Un formato cu a demostra di ta funciona, cu mas di 800 persona tabata uza y cu sigur a forma y desaroya hopi di nos artistanan di awendia.
Parlamentario Tromp-Lee a sigui bisa cu no ta un secreto publico cu les den cualkier disciplina di arte no ta algo cu tur famia por carga financieramente. Pa les di pintamento ya caba bo mester pensa entre Awg. 100,- pa 125,- pa luna, pa les di un instrument musical ya nos ta papia di Awg. 60,- pa 100,- pa luna y asina por sigui menciona. P’esey ta asina necesario pa crea e plataforma pa nos mucha y hobennan por bay les di arte den nan bario y pa un suma mas social. Esaki lo por keda stipula segun entrada di mayornan por ehempel.
Hunto nos ta avansa y mi ta convenci cu trahando hunto nos ta logra mas. P’esey 25 di juni venidero pueblo mester vota consciente. MEP a demostra cu nos a bin ta haci un tremendo trabou den Gobierno y den Parlamento. Si bo kier haya sa mas di mi persona y kico mi ta para pe, por sigui mi via mi Facebook Shailiny ‘Shai’ Tromp-Lee of via Instagram. E biaha aki mi ta number 11 riba e lista victorioso di MEP”, Parlamentario Tromp-Lee a duna di conoce.
