E imágen di e kasnan na bahada di Berg Altena sin lugá na duda ta un di e imágennan mas
usa pa promové nos pais i sentro di siudat. Diariamente turistanan ta saka potrèt i atmirá e
bunita kasnan pintoresko aki ku ta reflehá nos arkitektura i historia.
Pero lamentablemente poko ta esnan ku sa bou di ki kondishon habitantenan di e kasnan
aki ta biba, ku Fundashon Kas Popular (FKP) ta responsabel pa nan mantenshon. Esun ku tira
un bista krítiko mas di aserka por mira ku no ta mantené e kasnan aki manera mester ta.
Di paden e kas ta asina deplorabel ku por bisa trankilamente ku e habitantenan ta biba den
un situashon inhumano ku no ta digno pa un yu di tera ta biba bou di dje. Na diferente
okashon abitantenan a aserká FKP ku keho riba e situashon ku nan ta biba den dje manera
portanan kibrá, bentananan ku no por habri i otro defekto na e bibiendanan.
Tambe tin algun di e kasnan aki pará bashí i ta forma un kondishon ideal pa djaka i otro
bestianan ku ta trese un situashon ahigiéniko na entrada di nos siudat. Kasnan para bashí ku
drogadiktonan ta usa i kousa molèster pa e habitantenan aki.
E habitantenan lamentablemente no hañando oido i ta sklama pa FKP asumí su
responsabilidat i atendé ku e situashon horibel aki ku nan ta biba den dje. Pais ta prònk ku e
imágen parti pafó di e kasnan aki, pero e realidat ta ku e kasnan no ta den un estado ku ta
responsabel pa laga hende sigui biba den dje.
Den kuadro di esaki komo frakshon den parlamento, nos a hasi e siguiente pregunta na
minister di Trafiko, Transporte i Planifikashon Urbano, sr. Charles Cooper
1. Minister a tuma nota di e situashon di e kasnan riba Berg Altena ora minister pasa
bai Punda òf bini for di Punda?
2. Minister ta na altura di e situashon di negligensia ku e kasnan aki ta aden?
3. Kiko Minister ta bai hasi pa FKP asumí su responsabilidat i atendé ku e kasnan aki i
nan habitantenan?
4. E supsidio ku Ministerio di VVRP ta paga FKP tur aña ta inkluí mantenshon di e
kasnan riba Berg Altena tambe?
5. Si kontesta riba pregunta 4 ta afirmativo, ta kiko ta e motibu ku FKP no ta mantené e
kasnan aki?
6. Kiko ta e suma ku Ministerio di VVRP ta paga FKP pa aña pa hasi mantenshon di
kasnan sosial.
7. Kuantu kas sosial tin en total ku FKP mester mantené pa gobièrnu?
8. Minister por garantisá ku FKP no ta neglishá mantenshon di otro kasnan sosial di
gobièrnu?