Awor ku Gobièrnu kier baha Winstbelasting
Den parlamento a trata e “aanschrijving” kaminda ta bai baha impuesto riba ganashi pa kompanianan di 22% pa 15%. Esaki ta nifiká ku gobièrnu lo risibí ménos na entrada.
Frakshon di MAN ta kere ku Gobièrnu mester keda duna areglo ku ta mantene i duna sosten na empresanan i spesialmente empresanan chikí ku ta wesu di lomba di nos ekonomia.
Pero e loke ta importante pa MAN ta duna alivio na kresementu di nos ekonomia ku ta nifiká pan riba mesa pa kas di famia i pueblo.
Nos tur sa ku kosto di bida ta haltu i te awe nada di parti gobièrnu pa duna alivio konkreto. Preis di kuminda a bira haltu i ta hasi esaki ménos aksesibel pa pueblo.
Pa e motibu aki frakshon di MAN a bolbe hasi yamada na gobièrnu pa pasa man na kurason i atendé ku e lei di OZB ku parlamento a aprobá ku ta duna un bahada pueblo en general pero tambe hasi algu na e tarifa di Loonbelasting kaminda e klase medio, e pueblo trahadó ta keda ku mas sèn den su pòtmòni. Un klase medio totalmente neglisha.
Pa frakshon di MAN gobièrnu mester pone énfasis, promové i salbaguardiá “cost of doing business “ pero e kos mas importante , un nivel kosto di bida desente esta “ cost of a descent living” pa pueblo kompleto!
