Dia 31 di januari Parlamentario Mervin Wyatt-Ras a manda preguntanan pa ministro presidente. E preguntanan ta encuanto e.o. suicidio, depresion, ayudo by terapia. Wyatt-Ras a manda nan despues cu Aruba a ser sacudi cu e noticia di suicidio di un hende muhe hoben. Anja pasa tabatin 2 caso conoci di suicidio, mientras cu tin casonan di intento cu no ta yega den publicidad.
Wyatt-Ras a manda e preguntanan pa minister encarga cu asuntonan general di pais Aruba. Durante e periodo cu tabatin lockdown y shelter in place pa motibo di contagio cu COVID-19, profesionalnan riba tereno social y di salud a raporta aumento di problemanan psycho-social, depresion y otro problemanan di disturbionan mental, bou di cual tambe automutilacion y intento di suicidio. Pa loke ta trata ayudo y therapia pa hobennan, tanto fundacion Respaldo como departamento pa Asuntonan Social, Voogdijraad y Sostenemi tin listanan di espera halto. Crisisplan no tabatin e efecto cu a spera pa motibo cu no a baha e listanan di espera, manera a priminti ni a duna fundacionnan loke a ser bisa na nan. Buro Sostenemi no a logra e resultado cu a indica di registra y tene bista riba referencia di casonan. Pa loke ta trata abuso sexual e cooperacion entre instancianan no ta manera mester ta, despues di a inverti miyones. Gobierno awor kier introduci un otro forma di traha den un solo edificio pa stimula cooperacion. Esaki lo yuda e prome acohida y facilita prueba mientras e ayudo y terapia no lo haya atencion necesario. Pone profesionalnan den un solo edificio tampoco no ta duna garantia pa traha hunto ni pa miho cooperacion cu otro. Pa bon cooperation ta rekeri mas esfuerso, respect, bon registracion, follow up y coordinacion. E coordinacion aki ta keda falta.
Gobierno ta cortando den cuido y sector aki lo mester entrega 60 miyon florin pa anja, locual a ser palabra cu gobierno Hulandes ya caba na mei di anja 2020. E hecho cu a integra Asuntonan Social hunto cu Salud Mental bou di Justicia ta ser cuestiona. Durante reunion publico encuanto di LIM, Wyatt-Ras a haci pregunta dicon e combinacion aki y e minister cu a haya e carteranan aki, enbes di contesta e preguntanan a yama e parlamentario en cuestion pa hypocrita. Esaki djies paso Wyatt-Ras ta cuestionando crisisplan y su resultado. Kizas e minister aki ta kere cu manera e ta papia cu esnan rond di dje e por bin insulta e parlamentario. Aki e ta bon equiboca. Wyatt-Ras ta keda mustra ariba e voorbeeldfunctie cu mester tin.
E preguntanan di Wyatt-Ras na minister di Asuntonan General ta diverso, entre otro pa gobierno duna cifras di e cantidad di casonan di abuso, depresion y suicidio. Con largo e listanan di espera ta y pa duna evaluacion di crisisplan. A puntra gobierno unda 53 contractanten cu gobierno a pidi approbacion pa nan ta traha of ta ubica. Tambe ta puntra a base di ki argumentonan ta skohe pa integra Asuntonan Social hunto cu Salud Mental y bou Justicia? Ta puntra si e integracion a ser discuti cu veld? Ta puntra alabes si esaki lo hisa e barera of drempel pa por acudi pa yudansa. Tin persona cu pa miedo di ser enolvi cu Justicia lo no aserca profesionalnan. Con lo baha e barera aki?
Wyatt-Ras ta puntra tambe con lo paga pa yudansa psychiatrico awor cu e seccion aki ta cai bou di Justicia y no bou si Salubridad. Si crisisplan lo paga pa esaki? Un preocupacion di prome cu a lanta e crisisplan ta e listanan di espera cu enbes di baha a bira mas halto. Con e referencia lo ta despues cu e cliente pasa den e molina di prome acohida via di un centro cu ta tuma aangifte. E cliente por bin bek serca e profesional cu atend’e den prome instancia? Of unda e lo ser referi e ora? E Parlamentario ta puntra alabes ki rol buro Sostenemi lo haya y ki dia Parlamento lo ricibi e ley contra abuso di mucha cu e Ministro Presidente a priminti di 6 minuut?
Segun Wyatt-Ras gobierno ta sigui pidi sosten pa crisisplan, mientras cu na momento cu haci pregunta y cuestiona, gobierno enbes di contesta ta insulta. Gobierno y en especial, e ministernan nobo cu caba di sinta mester sa nan rol y lugar. Nan tin cu responsabilisa na Parlamento di Aruba, cu ta controla gobierno. E parlamentario ta spera di ricibi contesta ariba su preguntanan.
