Siman pasa a tuma luga den Parlamento e reunion publico pa trata e debe di Covid pa pais Aruba. Den a reunion a resalta esnan cu ta na fabor y esnan cu ta contra Raft. Parlamento den su mayoria a vocifera cu nan no ta di acuerdo cu e Raft por lo tanto a pidi Gobierno pa sigui negocia cu Hulanda pa asina haya un solucion pronto na bienestar di nos pais.
Partido MEP ta sigur di un cos, esaki ta cu Gobierno di Aruba, bou maneho di Minister President Evelyn Wever-Croes, ta sigui na mesa cu Hulanda pa asina yega na e solucion corecto pa nos pais Aruba.
Partido MEP a tuma nota cu Parlamentarionan Miguel Mansur y Ryçond Do Nascimento, den un reuda di prensa a vocifera cu nan ta na fabor di un Raft y a manda un carta pa Hulanda cu intencion di logra aprobacion di Raft na Aruba.
Bisando esaki, Partido MEP ta asegura Parlamentario Mansur y Parlamentario Do Nascimento cu Gabinete Wever-Croes ta haciendo esaki y lo sigui na mesa di negosacion cu Hulanda te ora haya un salida cu ta beneficia Aruba. Por a tuma nota tambe cu Secretario di Estado Alexandra Van Huffelen diabierna ultimo a confirma tambe cu e negosacionnan ta andando den e bon direccion. Gobierno keto bay ta na mesa cu Hulanda pa saca e miho deal pa nos pueblo.
Asina ta, Partido MEP ta conseha Parlamentario Mansur y Parlamentario Do Nascimento, pa no ansha y keda trankil y laga e Lider di e pais aki y Gobierno sigui negocia cu Hulanda den e proximo dianan aki nos dilanti. Prome Minister Evelyn Wever-Croes lo sigui trece tur informacion pa nos pueblo manera cu yega na un conclusion cu lo beneficia Aruba.
Comunicado Partido MEP
