Ta sumamente tristo tuma nota di desaroyonan cu San Nicolas a conoce bou di gabinete Wever Croes, caminda mescos cu tur otro bario, no a ricibi for di gobierno di Prome Minister Evelyn Wever Croes, ningun di e tantisimo promesanan cu e gobierno aki a haci na pueblo.
Melvin Tromp di partido AVP ta mustra cu no solamente ta tristo pero tambe ta un insulto grandi ora cu scucha tanto Prome Minister den Parlamento algun dia atras, papia di logronan di su gobierno pa San Nicolas y otronan di mesun gobierno aki, ta pretende cu tur cos ta bin pa e bario aki.
“Pa cuminsa tin cu ilustra y aki tur hende por a ripara pa hopi tempo caba, cu ora cu yega e asina yama “approach road” pa San Nicolas, cu ta e entrada practicamente, tin un scuridad increibel, como si fuera no tin bida den e bario aki, ya cu ni cambio di algun bombiyo cu ta kima, gabinete Wever Croes no por a cambia.
Prome Minister den Parlamento den un bijeenkomst yama pa lider di POR, tabatin e curashi di papia di e gran logro di su gobierno, cu a logra di recupera e refineria di San Nicolas bek pa pueblo di Aruba.
Segun Evelyn e oficina di su Papa a logra di anula un contracto di mas malo cu a yega di conoce, librando e pais for di CITGO y asina pueblo a haya e refeniria bek.
Aki por mira con hopi falta di respet Prome Minister tin pa no solamente pueblo di San Nicolas pero henter pueblo di Aruba ya cu na momento cu bo regala un compania petrolero manera CITGO casi 350 miyon florin, esaki no ta un hazaña.
Gabinete Wever Croes a core cu CITGO sin cu e compania aki mester a paga 300 miyon dollar pa no cumplimento di e contact, loke mester a tuma lug ana luna di oktober ultimo pero pa Evelyn esaki ta un logro, esta placa cu por a yuda e pais, cu por a yuda San Nicolas a bay perdi.
Fuera di e suma di placa aki, CITGO tabata pagando na leasenan di tanki y tambe pago di impuesto pa erfpacht cu ta alrededor di 40 miyon florin pa aña cual sumanan ya gobierno no a hayando mas y ta placa cu tambe por a wordo usa den e momentonan dificil aki cu e pais ta pasando aden.
Esaki ta un insult di marca mayor, caminda Prome Minister di un pais, ta pretende di hunga cu inteligencia di nos pueblo, pretendiendo cu el a logra hopi, mientras cu simplemente el a perhudica pueblo totalmente.
Awendia tur hende cu yega San Nicolas den oranan di anochi, ta mira con scuridad a podera di e bario aki, no tin lus di caya cu ta bon pa hopi tempo caba, cual ta mustra con poco atencion y interes gabinete Wever Croes tin pa e bario aki.
Siman pasa otro integrante cu ta sostene e gobierno actual, a cuestona maneho di AVP cu San Nicolas no tin un eficio di MFA, indicando cu e vision di AVP aki, tabata corecto y na su luga.
Sinembargo su gobierno mes, por a pone e suma di 5 miyon pa San Nicolas a haya un edificio di MFA pero awor ta yegando final di e gobierno aki sin cu esaki a sosode pero si a duna ex Minister di Infrastructura, 6 miyon florin pa drecha oficinanan di gobierno caminda a hinca ainda mas coordnador y otro hendenan liga na e partidonan den gobierno.
No tabatin placa pa San Nicolas, no a haci nada pa San Nicolas y pa colmo e mesun gobierno caminda Minister Glenbert Croes a lanta un “helpdesk” caminda ciudadanonan di San Nicolas y rond Aruba por a pone nomber pa traha den e refineria ora cu e habri, su propio gobierno a core cu e posibilidad di trabou aki,” Melvin Tromp a declara.