ORANJESTAD,Aruba
Mientras cu casonan di atraco y ladronicia ta sigui aumenta den comunidad, Aruba ta conta c’un Minister di Husticia kende simplemente no tin nocion di kico ta su responsabilidad.
Melvin Tromp di partido AVP ta mustra cu ultimo simannan, mientras cu comunidad ta sigui wordo confronta cu casonan di atraco y ladronicia den practicamente tur bario, Minister Andin Bikker no tin solucion pa pueblo.
Unico cos cu pueblo a cuminsa ripara di e Minister aki, ta cu e ta biba den un mundo di fantasia cu e mes no ta kere aden pero e ta spera cu pueblo lo guli su fantasianan cu tur ora e ta trece dilanti.
“Ta increibel pa mira con otro minister di Gabinete Wever Croes ta presta su mes pa gaña pueblo cu pretextonan sin pia ni cabes, pa motibo di no por cumpli cu tur loke el a priminti pueblo durante di campaña electoral.
Minister Bikker mescos cu tur otro den Conseho di Minister di Gabinete Wever Croes, no a duna pueblo loke nan a priminti pueblo y tur cos cu nan a haci, ta net lo contrario di loke nan a sigura pueblo cu nan lo haci.
Minister Bikker a priminti pueblo cu e lo caba cu criminalidad riba nos isla asina cu e bira minister, cu e lo pone alarma na tur cas den tur bario y lo sigura cu pueblo lo por biba y drumi trankil den nan cas tur anochi.
Awe pueblo ta mas spanta cu nunca, caminda caso di atraco tras di atraco ta tumando luga, caminda ni respet pa e propio Minister di Husticia e atracadonan no tin, ora cu nan a cometa un atraco algun caya tras di caminda Minister Bikker tabata sinta ta duna declaracion na prensa.
Entre su promesanan cu el a trece durante di e ola di atraconan cu a bin ta tumando luga recientemente, ta e uso di ‘drones’ caminda lo bin cu cos oficial di polis cu lo maneha henter e proceso aki pero dos luna despues, ainda nada di drones.
Bikker a papia di ‘alarmbox’ cu lo ta costa solamente 8 Euro, acusando ex Minister Dowers di no a haci nada pa percura pa pueblo por haya esakinan pero te dia di awe, dos aña despues cu el a huramente, ningun box di alarma den ningun cas na Aruba.
Despues Bikker a bay otro conferencia di prensa y mustra cu e tin un profeso na Corsou cu lo ta dispuesto pa bin yuda Aruba den e lucha contra di ‘fake-news’ ya cu esaki den su concepto ta algo hopi serio y mester combati esaki mesora.
Te awe ningun hende a tende di e experto aki y tur cos ta mustra cu Minister Bikker lo a realisa cu fake news no ta comunidad su problema number un na e momentonan aki.
Awor e siman aki Minister Bikker a bin cu otro noticia impactante, caminda el a bisa cu e lo bay haci loke ex Minister Dowers no por a haci, esta di construi un KIA nobo y cu e ta hopi avansa den e proceso aki.
Segun Bikker su obstaculo mas grandi ta e forma con pa financia esaki y ta analisando varios forma pa por haya placa pa contrui un KIA nobo y hasta a bay asina leu pa bisa pueblo cu ya e tin como 16 compania cu lo ta interesa pa participa den e proyecto aki.
Di unda el a sali cu e 16 companianan aki ningun hende sa ya cu ta un plan cu ta e siman aki el a cuminsa papia di dje pero lubidando cu e ta formando parti di un gobierno cui no tin ni presupuesto pa 2020, corda pa por convence institutonan financiero pa financia un proyecto di e magnitud aki.
Bikker a menciona cu e tin cu convence CFT y Hulanda riba e forma con lo financia e proyecto aki pero en realidad gobierno di Bikker ainda no por convence CFT y gobierno Hulandes cu su presupuesto 2020 cu ta cinco luna atrasa, corda pa convence nan awor pa un KIA nobo.
Esaki ta otro fantasia di Minister Andin Bikker kende ta sigui ilusiona su mes cu cosnan cu tin ora e mes no ta kere den nan pero ta spera cu pueblo lo kere den esakinan,” Melvin Tromp di partido AVP a declara.
