Recientemente Prome Minister y lider di MEP, Evelyn Wever Croes, mey mey di un pandemia serio, di problemanan financiero pa gran parti di pueblo, di problemanan economico y social, a dicidi di informa pueblo cu su partido MEP a habri campaña electoral 2021.
Melvin Tromp di partido AVP a mustra cu aki pueblo por ripara atrobe, cu e grito di tanto e Prome Minister aki como otronan den su gobierno, cu nan tin e ser humano central, simplemente nunca tabata y nunca lo ta e caso.
“Simplemente pa e hecho cu na mes c’un ocasion Prome Minister a mustra bon cla cu interes di pueblo ta bin na di dos luga, ya cu na prome luga ta bin su mes, su famia cercano su famianan un tiko mas aleha, amigonan di dje, sponsornan di partido y cu no tin nada bon pa pueblo.
Mey mey di un pandemia, mey mey di e tristo decision caminda el a entrega autonomia financiero di e pais na Hulanda, Evelyn a haya tempo pa traha pa partido, a haya tempo pa pone pandemia un banda y a dicidi cu e lo cuminsa pido pueblo pa bolbe vota pa su partido, sin cu e tin algo pa mustra pueblo kico el a haci pa nan.
Gabinete Wever Croes ta e gobierno cu ta marca historia pa traiciona un pueblo sin cu nan tin berguensa of sentimento di culpa di a haci esaki, caminda a haci asina hopi promesa durante di campaña electoral di 2017, pa despues drenta gobierno y haci net lo contrario di loke a wordo priminti na pueblo.
Ta bin acerca cu no solamente Evelyn a dicidi di habri campaña mey mey di pandemia, pero ta hunga cun Parlamento dor di manda yama un reunion informativo, pa duna di conoce cu lo tin dos compania cu lo kier inverti den e refineria anto cu nan tin e suma di 3.5 biyon florin pa esaki.
Sinembargo mayoria di pregunta importante cu a wordo haci na Prome Minister durante di e reunion informativo aki, e no a duna contesta ya cu lo tin un acuerdo di secrecia firma por lo pronto caminda lo no divulga nada concreto pero pa haci politica barata, Evelyn a manda yama un ‘bijeenkomst’ cu mayoria di bes no ta publico, haci esaki publico ya cu ta e prome acccion di campaña cu e lider di MEP kier a bin pronk cune.
Un acto di payaso ya cu ta mesun Evelyn aki a duna ordo na bufete di abogao di su tata, pa studia e contract cu e compania Mericano CITGO, pa asina kibra e contract y laga e hendenan aki bay sin paga 300 miyon florin cu tabata stipula den e contract.
Sinembargo loke pueblo por mira bon cla aki, cu e tipo di accionnan ridiculo aki, ta otro intento di un Prome Minister, cu no tin duele, kende no ta sinti remordimento cu el a gaña henter un pueblo den ultimo tres aña, pa usa mesun triki aki di priminti cos cu e lo no cumpli cu nan despues.
En realidad aki nos por conclui cu debi cu den 2021 ya a dicidi cu lo no celebra carnaval debi na e pandemia di corona virus, Prome Minister Evelyn a dicidi cu e lo prepara su grupo politico den un ambiente di carnaval y asina pasa den tur bario cu loke nos por yama e “Carosa di Mentira” pa trata di haya sosten di pueblo, pa e sigui na poder.
Ya caba den Parlamento siman pasa, Evelyn tabata zwaai cu documento, di un invesionista cu lo habri e refineria pero cual compania tin un adres cu ningun hende sa kico e ta, pero manera un Reina di Carnaval Politico, e Prome Minister a trata di convence un publo cu ya caba ta bon na altura di su triki- y mentiranan,” Melvin Tromp di AVP a declara.
