Mep a campaña cu nan conoce e materia y cu lo goberna sin medida, pero e realidad a resulta otro. Mep a introduci yen di medida, pues un engaño total. Partido mep ta bayendo pa di 6 aña di gobernacion pero nos por mira cu nan no a bin cu ningun projecto pero si cu hopi medida. Resultado di e medidanan aki por mira tur caminda paso nos isla ta bayendo atras cada dia cu pasa. Parce cu e 6 añanan di gobernacion aki nos ministernan ta manera turista. Un gobierno cu ta puro biahamento y sin resultado. Un gobierno cu 6 aña ta cobra y ta haya tur sorto di toelage pa biahamento pero sin ningun resultado na bienestar di nos pueblo.
Nos por a sinti cu den pueblo tin basta disgusto grandi pa exoneracion di ex minister di turismo y transporte encuanto di e contract cu Tofanelli. Un ex minister no solamente un biaha sino 3 biaha no a respeta e ley di Comptabilidad. E mas tristo ta cu e contenido di e contract a keda scondi pa pueblo y Parlamento di Aruba. No por a saca afo unda e placa di pueblo a wordo malgasta. Un rapport di CAD cu ta papia bon cla cu ta mustra cu placa di pueblo a wordo malgasta y no tin ningun caminda para cu por hustifica e malgastamento aki. CAD a mustra e gobierno di avp cu pa haya sa e berdad tras di e contract di Tofanelli mester a laga un investigacion penal tuma lugar. Lastimamente nunca a entrega un keho oficial. Un investigacion penal sigur lo por tabata tin consequencianan pisa pa e ex minister. Nos por corda cu a usa e palabra di Universidad di corrupcion pa e gobierno di avp pero e imagen di partido mep den e gobierno di 2001 pa 2009 no ta mihor tampoco. Durante 8 aña di gobernacion di avp nada no a wordo hasi cu e contract di Tofanelli tampoco. Riba dje e ex-minister ta mara pais Aruba na un contract di $850.000,= y un Parlamento cu kier tapa mal gobernacion di partido mep intencionalmente a vota pa paga awg.2.120.000,= for di caha di gobierno. Un pregunta grandi ta keda cu ta usa placa di pueblo sin cu tabata tin un destaho publico y sin cu tabata tin autorisacion di Parlamento pa un suma di mas di awg.100.000,= . Parlamento ni sikiera tabata interesa pa sa e contenido di rapport di CAD. Hopi pregunta ta bin dilanti cu no ta por nada cu partido mep a gara e cartera di minister di Turismo for di 2017. Esaki ta netamente pa asina salba e ex ministernan di partido mep den e gobernacion di 2001 pa 2009.
Nada no a cambia di partido mep di 2009 y di e mep di 2017. E gobierno di mep aki concientemente no ta respeta e ley di comptabilidad y ta hasi uso di placa di pueblo pa despues di 2 aña ta pidi Parlamento pa exonera e ministernan di nan responsabilidad. E gobierno aki no tin respet pa nos leynan y ta hasi cu ta nan ta doño di pais Aruba paso nan por hasi y deshasi cu placa di nos pueblo. No tin placa pa nos grandinan y esnan cu no tin trabao cu mester paga nan eigenbijdrage na AZV pa nan remedi. Salud di nos pueblo no ta importante p’esey locual cu ta para den punto 3 di salud y bienestar di desaroyo sostenibel ta puro gañamento. Ken por kere un gobierno cu a prefera di laga nos grandi y esnan sin trabao muri cu yudansa den compra di nan remedinan. Nos por mira cu na Hulanda partido BBB ta pidi pa hinca mas placa den cuido paso tin necesidad y aki na Aruba gobierno di Aruba ta kita 60 miyon florin for di fondo di AZV.
Nos por mira berdad cu ningun hende por hasi bofon di Dios paso lo cual bo sembra lo bo cosecha. Tur e partidonan cu a vota na fabor di leynan cu ta bay contra di principionan di Dios lo sufri nan consequencia di nan maldad. E husticia di Dios ta na caminda. Partido Curpa un partido cu ta para pa leynan di Dios y lo sigui lucha pa e bienestar di e famia crea pa Dios. Partido Curpa ta e unico alternativa.
