Relashoná ku vários señal for di polis i komunidat, dentro di poko ta sera e waf di piskadó na Kaya J.N.E. Craane temporalmente pa públiko.
Durante e periodo tras di lomba kada biaha tabata surgi mas keho di molèster. Entre otro tabata molestiá hende muhé i tin ora asta tabata mishi ku nan ora nan kana pasa. Banda di esaki tin señal tambe di aktividat ilegal riba i rònt di e waf. Ta trata akí di entre otro kontrabanda ilegal di produkto i persona, aktividat relashoná ku droga, ladronisia i menasa. Esaki a kondusí na e echo ku no ta usando e waf mas pa loke e ta intenshoná, esta pa e piskadónan.
E waf ta propiedat di Entidat Públiko Boneiru. Pa e motibu akí despues di konsulta ku Kuerpo Polisial Hulanda Karibense, Koninklijke Marechaussee, Stinapa, kapitan di haf i Piskabon, gezaghèber a disidí pa sera e waf pa públiko i tuma medida pa mehorá e fasilidatnan na i rònt di e waf na benefisio di e piskadónan. Pero tambe pa promové siguridat di nos poblashon en general. Por ehèmpel resientemente a pone palu di lus kantu di awa. Despues ku sera e waf lo kita e konstrukshonnan ilegal i eventualmente botonan ilegal i lo regla maneho di e waf.
Den e tempu binidero lo komuniká tokante ki dia e seramentu ta tuma lugá eksaktamente i kua ta e palabrashonnan ku ta bai hasi tokante uso di e waf di parti di e piskadónan.
