Na su salida di e sesion di brainstorming ‘Turismo den Perspectiva: Scucha, Pensa, Recupera Miho’ 24ora a pidi Mediador di Gobierno, Anselmo Pontilius pa comparti pakico el a considera su participacion na e encuentro organisa pa Partido di Pueblo Arubano (AVP). El a indica cu “tur aporte cu nos por duna den un situacion manera esaki, den crisis, ta importante.” E lider sindical a enfatisa cu mester tuma decision y actua awo. “Nos no por keda papia si, nos tin cu haci.”
Pontilius a indica cu, como dirigente laboral, el a yega di biba un crisis bek na 1985 ora refineria a cera, pero cu apesar cu tin situacionnan identico, e crisis aki ta hopi mas grave. Y e ta teme cu, como tin un eleccion otro aña, politiconan lo ta mas ocupa ta core campaña, cu atendiendo e problemanan real cu tin ey’fo. Mescos ta conta entre sector comercial y sindica cu por tuma iniciativa propio pa cera acuerdonan. “Nos no por keda keha cu nos tin hende cu no tin con pa paga awa of coriente; nos tin cu bisa ki solucion nos ta busca pa nan.” Adicionalmente, gobierno tin cu sigui traha riba un acuerdo cu Hulanda, segun Pontilius.
Mientrastanto mester splica e comunidad, esnan cu ta na punta di perde trabou of cu ta bay perde trabou, kico ta spera nan pa 2021, 2022. Mediador di gobierno ta puntra mes “E trahador cu su permiso di trabou ta vence, kico ta pasa cune? E ta bay bek su pais, si of no? Ta contestanan cu e comunidad mester y nos tin cu recorda e comunidad cu aunke nos tin crisis, nos por supera paso ningun crisis ta pa semper. Pues tin cu keda manda e mensahe positivo, pero tambe un cantidad di hende na januari kier sa, si nan no tin trabou, nan lo keda cobra 900 di FASE? E compania cu bo tin, lo sigui ricibi e subsidio di salario? “E contestanan ey nos mester di nan, y mi ta compronde cu gobierno a prepara varios encuentro di dialogo y e tin cu sosode, pero no dialogo pa dialogo, pero dialogo pa tuma decision,” Pontilius a afirma.
Di otro banda, loke e lider a bay cune for di e encuentro cu representantenan di sector turistico y comercial, ta cu ta irealistico pa spera cu ya caba na 2021 tur hotelnan lo ta yen. Den e caso cu hotelnan ta solamente na 40% of 50% di ocupacion, kico e ta nifica pa cada trahador? E trahador cu ta custuma cu su tip of cu su salario 100%? Cuanto luna caba e trahador cu tin 60%, of no tin salario mes, kico nos ta dune pa e sa y pa e prepara?
“Pues na e momento aki nos tin cu actua y tur hende hunto tin cu actua irespecto di diferencia di opinion politico y partidista, pa motibo cu e crisis aki tin cu obliga nos pa separa, pone bo bandera di bo partido un banda y atende cu e problema di e comunidad, Pontilius a bisa. “Nos lidernan politico cu ta tuma decision, di tur partido y color politico, tin un obligacion pa para keto un rato y reflexiona con conhuntamente nos ta bay supera e problemanan y duna perspectiva particularmente na esnan cu ta perdiendo trabou of ta bay perde trabou.”
