MBO Bonaire a entregá 101 diploma. E graduadonan di nivel 2, 3 i 4 a risibí nan diploma for di man di nan guia/konsehero di estudio. E entrega di diploma festivo a tuma lugá riba plenchi di MBO Bonaire.
Skol a risibí e graduado- i nan invitadonan ku un snèk i un bibida. Despues di un fotoshoot Liset de Keijzer, direktor di unidat di MBO Bonaire, a habri e seremonia ofisial ku un diskurso. E guianan di estudio i lidernan di tim tabatin bunita palabra di e studiantenan, loke a mustra kla kon orguyoso nan ta di e dedikashon, esfuerso I aspirashon di e graduadonan.
Ultimo aña no tabata un aña komun I koriente. Pa motibu di e pandemia di COVID, studiantenan a haña nan ku enseñansa na distansia i algun kompania di stazje mester a sera porta temporalmente. Debí na esfuerso di e studiantenan i e tim di MBO Bonaire, tòg 101 studiante por a terminá nan estudio eksitosamente.
Entretenimento musikal durante e entrega di diploma tabata den man di DJ Veloce i Luigi Molina. Presis un aña pasá Luigi tabata un studiante di MBO Bonaire ku a risibí su diploma. Ku mashá entusiasmo el a kanta entre otro e ‘kansion di MBO Bonaire’ ku el a komponé huntu ku lider di tim Vanessa Daniel.
E estudio Sekretaria, e estudio BBL na Papiamentu KOKI i e estudio BOL na Hulandes KOK e aña akí tin un resultado tremendo ku 100% graduado. E aña’kí pa promé biaha e estudio Profeshonal Multifunshonal empresa di Mantenshon i Reparashon i e estudio Kolaboradó Hurídiko, tabatin graduado.
Un kantidat grandi di graduado ta pasa na MBO Bonaire pa un siguiente nivel. Otronan ta kuminsá ku nan karera den region òf ta habri hala bai Hulanda òf Merka pa sigui un estudio HBO. Tim di MBO Bonaire ta deseá tur graduado hopi éksito den futuro!
1 comment