Awe tabatin ponemento di prome piedra na Mon Plaisir College, unda lo bay construi e facilidad pa expansion di klasnan di HAVO.
Randall Croes, presidente di fundacion di Stichting Protestants Christelijk Onderwijs Aruba (SPCOA), a hiba palabra y a mustra riba e expansion di capacidad di e klasnan pa HAVO cu no ta beneficia Mon Plaisir College so sino henter Aruba. “Aki ta dal un paso pa cumpli cu e demanda di expansion di e poblacion di e ultimo dies añanan, y duna mas chens na hobennan pa sigui cu nan estudio di HAVO.”
Ta bay construi cinco (5) localidad e aña’ki ainda, y pa cumpli cu e demanda di cupo, ta bay huur un otro espacio pa acomoda e studiantenan te ora cu e construccion finalisa.
SPCOA ta masha gradici na Minister di Enseñansa, kende semper a apoya e fundacion den e proyecto aki. E fundacion ta cuminsa tuma muchanan for di kleuterschool y despues por sigui, segun nan capacidad, pa MAVO y HAVO eynan mes.
Minister di Enseñansa Rudy Lampe a expresa di ta contento cu e desaroyo aki na Mon Plaisir College. Esaki pasobra gobierno y su Ministerio semper tabatin e vision pa duna mayornan mas opcion posibel riba tereno educativo. El a recorda otro proyectonan cu su ministerio a apoya e aña’ki manera e scol completamente na Spaño, di Iglesia Adventista, cu ta duna oportunidad na migrantenan, pa sigui nan estudio na Aruba.
“Nos ta creando opcionnan. No tur mucha ta igual, pa cual awo studiante y mayornan tin opcion di unda ta miho pa nan sigui nan estudio. E diversificacion di enseñansa a keda manifesta por medio di tur e otro institutonan educativo cu a bini den e sistema di HAVO. Un tempo tabatin un HAVO so di Bisdom Willemstad. Despues a bini Colegio Nigel Matthew, cu ta duna mas tempo pa termina HAVO y ta publico. Bou di e gobierno aki a cuminsa cu un scol di dos idioma y publico cu ta De Schakel na Noord, cu ta MAVO, HAVO y VWO. E ta subsidia pa gobierno. E ta un opcion diferente pa mayornan cu kier pa nan yiu studia den idiomanan Hulandes y Ingles. Esaki ta nifica cu mayornan tin 4 opcion for di cual por scoge. Tin oportunidad pa tur mucha, y no ta cera porta pa ningun hoben.”
Ta hopi proyecto di enseñansa a bin ta trahando riba dje, e mandatario a bisa. Y el a duna e ehempel di e extended GED cu a traha riba dje hunto cu International School of Aruba. Esaki ta brinda oportunidad na hobennan cu na edad mas hoben por cuminsa, via plataforma digital, pa haci full nan enseñansa na Ingles. Esaki ta principalmente pa esnan cu kier sigui nan estudio mas halto despues na Merca.
E tabatin elogio pa e imagen cu Mon Plaisir semper a logra mantene na halto. E demanda pa studia na Mon Plaisir ta halto y lista di espera ta largo. “Nan ta un scol serio y respeta den comunidad. E merece e apoyo aki ya cu nan a demostra nan derecho di existencia, ofreciendo un educacion di calidad y cu disciplina.”
Directiva di SPCOA a tuma man habri e oferta di enseñansa digitalisa, cu ta un innovacion cu nan a sigui experimenta cu ne. E reaccion di esnan cu ta duna guia na e scol ta hopi positivo. “Mi no tin duda cu e lo bay ta un exito e proyecto aki di Mon Plaisir HAVO.
