ORANJESTAD, Aruba
E siman aki tawata hopi rough. E no tawata un siman facil pa gobierno y pais Aruba. No tawata consiente cu nos lo haya casonan nobo tanten Covid-19 tey. Ningun caminda na mundo no tin casonan di Covid. E ta un realidad cu nos mester biba cune.
Naturalmente nos no a pensa cu nos lo haya nos mes confronta cu un situacion caminda casonan ta subi tur dia exponencialmente. E sitio di contagio cu tawata un club nocturno ta pone si cu e cantidad di casonan positivo lo subi masha liher mes.
Awe a bin 89 caso nobo. Di otro banda a haci mas di 703 test riba un solo dia. E strategia di haci mas y mas test, identifica casonan positivo trempan, isolanan y percura pa tin bon contact tracing semper a duna bon resultado. Logicamente mas test nos haci mas caso positivo nos lo identifica.
E edad di esnan positivo e siman ako ta entre 17-49 anja y NINGUN persona a wordo interna den hospital. Na final nos mester percura pa cuida esnan vulnerabel pa evita cu nan por bira malo y bai hospital cu por conduci cu nos por haya nos mes cu problema di capacidad.
Ta hopi importante pa tur hende bira consiente cu covid ta den nos communidad.
Nos mester tin e disciplina awor pa evita cu mas hende ta wordo contagia.
E ta den nos man con nos ta sigui e proximo dianan y simanan nos dilanti.
Nos mester sigui e protocolnan.
Sigui mantene distancia.
Sigui laba man continuamente.
Sigui guidelines.
Ban nos tur hunto percura pa e disciplina cu ta asina importante pa mantene nos economia habri y evita cu Covid-19 ta sigui plama den nos communidad. Ban pensa riba esnan vulnerabel y ban cuida nan. Cuida bo mes, sea responsabel, demostra disciplina y cuida bo famianan y sernan keri. Percura pa hiba un bida saludabel, haci ehercicio, come saludabel y boost bo systema immunologico.
Nos mester maneha Covid y no laga Covid maneha nos.
Ban nos tur hunto yuda otro!
