Djaluna 12 di april 2021 ta sali den korant Vigilante riba página di farándula kaminda dòkter Jerry Semper ta deklará ku si 85% di poblashon di Kòrsou bai bakuná lo tin karnaval otro aña 2022.
Esaki ta inaseptabel. No por ta asina ku un dòkter ta bini dilanti, manipulando e pueblo ku si 85 % bakuná lo bai tin karnaval otro aña.
Mi ta haña esaki un falta serio di rèspèt, pasobra no ta na dòkter pa duna di konosé ku si pueblo bai bakuná lo tin karnaval 2022. Pues ta nifiká ku si pueblo di Kòrsou no bai bakuná i e total keda bou di 85% lo no tin fiesta pa pueblo di Kòrsou. Farándula lo keda morto manera e ta aktualmente.
Aki ta mira atrobe ku dòkter Semper ta trese un situashon dilanti pa asina gana tur hende pa bai bakuná. No ta aseptabel pa sigui manipulá yu di tera. Fiesta di pueblo ta keda di pueblo i mester ser respetá komo patrimonio propio. No por menasá pueblo uzando un tradishon patrimonial propio komo arma kontra e mésun pueblo.
Si nos ta biba realmente den un pais demokrátiko anto mester respetá tur esnan ku no ke bakuná pa un òf otro motibu.
Mi ta aseptá i rekonosé ku nos ta den un pandemia mundial. Esaki ta pone ku nos mester hala un brek na nos farándula pa asina sali for di e pandemia aki. Pero no ku ta bin papia den un rueda di prensa ofisial di gobièrnu pa manipulá un pueblo kompletu.
Kiko lo pasa si 85% bakuná i covid-19 keda reina i bira pió aki na Kòrsou? Dòkter Semper bo tin un kontesta riba esaki? Por fabor apliká strategia i métodonan sientífiko pa informá, forma i guia pueblo. Manipulashon no ta forma parti di edukashon.
