Bons coach di seleccion nacional di AVB Marvic Bermudez tabata presente na e evento cu a ser organisa pa AVB mes unda cu e deseo tabata pa tin contacto mas estrecho cu media di Aruba. Den un entrevista cu EA News Marvic ta conta nos cu AVB a keda invita door di e organisacion di Corsou cu ta organisa ABCS CUP cu ta Aruba,Boneiro, Corsou y Surnam.
E formato di e ABCS CUP di e aña aki ta un poco diferente, aña pasa a hunga cu full hungado local cu paspoort Hulandes, pero e aña aki ta cu hungadonan local dus di e competencia local di division di honor, pero e por ta un combinacion di 13 hungado cu tin paspoort Hulandes y cinco hungado cu no tin paspoort Hulandes. Segun Marvic Bermudez esaki ta un di e cambionan cu tin den e formato.
E biahe lo tuma luga dia 24 di november te cu dia 27 di november na Corsou y e prome wega ta contra di e seleccion di Corsou mes . Tanto pa Aruba, Boneiro, Corsou y Surnam e condicionnan ta conta pa tur e paisnan. E cambio aki ta atractivo pa e competencia mirando cu tin hungadonan internacional cu tin varios aña caba cu ta hunga den competencianan local di Aruba y no tin mucho mas pa nan. Segun Marvic Bermudez si nos ta realistico den e ultimo añanan aki e hungadonan internacional a significa hopi pa na e competencianan local, si mester mira den su totalidad e cambio lo haci ABCS CUP mas interesante.
Sinembargo Aruba su delegacion ta cla pa bay Corsou aunke cu e trainingnan no a cana 100% manera mester ta, pero esaki ta debi na diferente factornan. Un di nan ta cu AVB su competencia ta andando y e aña aki AVB a cambia e formato di e competencia y a hacie mas interesante.
Antes tabata hunga 2 rond y despues 4 team ta clasifica pa playoff , pero e aña aki nan a haci e cambio unda cu den e prome ronda di e 10 ekiponan 6 ta clasifica bay division di honor oro, di e 6 nan ta clasifica 4 cu ta bay hunga e playoff y despues di e 4 nan ta bay hunga e dosnan. Esaki ta pone cu e competencia ta cuminsa mas trempan y ta mas interesante cu ta pone cu awo e clubnan ta un poco mas cauteloso pa duna e hungadonan e libertad pa bay train seleccion paso nan tambe tin nan prioridadnan.
Tambe debi cu e competencia di ABCS CUP ta un competencia amateur tin hopi hungado cu tin cu traha warda, tin famia, tin momento mester scoge kico ta prioridad. Pero mester bisa si cu e hungadonan ta train tres bes pa siman cu nan mes un club y nan ta hunga un wega cu nan club cu tin nan compromiso caba y si mester bay pone un compromiso extra cu seleccion e ta bira mucho hopi y no lo tin tempo pa su famia. Segun Marvic Bermudez tambe nos mester ta realistico e futbolista no ta haya nada acambio pa su dedicacion na esaki. NADA.
Pesey mes e ta un escogencia cu e futbolista ta scoge pa haci unda cu e ta traha extra, overtime , dedica tambe na famia of bay train pa seleccion. Tipo di decisionnan asina hopi biaha no ta facil y esey a haci tambe cu e preparacion no a bay manera desea, pero na momento cu a train por bisa si cu e hungadonan a duna di nan mes 100% y esey ta duna un bon sentimento unda cu e hungadonan lo duna un bon wega na Corsou pa representa nan pais Aruba.