ORANJESTAD, Aruba
Ta parce cu pa por regla terenonan prominente rond di e area di waf na Oranjestad, cu ex Minister Otmar Oduber a sali for di maneho di DIP pa regla otro terenonan pa esunnan cu tin e decision den nan man. “Ta style di un man ta laba otro of cani mi pa mi cani Bo”, asina parlamentario Marlon Sneek di partido AVP a denuncia. E ta bay haci pregunta e siman aki na Minister Marisol Lopez, ora e bin den e di dos tanda den Parlamento, pa splica ken a haya un tereno cu “no ta existi“ y contra ki fabor.
“Semper DIP tabatin e area ey bon proteha. Diripiente a habri un solo plot pa un solo persona”, di acuerdo cu Marlon Sneek. E kier sa cu ki meta DIP a cambia nan maneho di hopi aña, bou instruccion di ken y pa cumpli cu ken. Tambe e kier sa si Minister Marisol Lopez a continua cu e maneho corupto aki, contra maneho y sigur cuestionabel.
Terenonan protehi pa decadanan pa pueblo, awor e Gobierno aki kier regala na compinchinan cu mester firma pa parti tereno den waf. “Ta pa e cosnan aki Otmar Oduber mester a baha na awa na careda pasobra el a sinti e rosea cayente di Landsrecherche yegando cerca dje. E tabata sa cu nan ta su tras, pasobra el a cuminsa haci di mas”, segun Marlon Sneek.
Ta parce cu ora MEP a ripara con facil nan ta fix cos den POR, cu nan tambe a bira golos y a cuminsa demanda pa yuda nan hendenan. Ora cu na DIP a para nan careda di bina, mesora a sali gritonan for di seno di MEP cu mester kita Haime Croes pa pone Robert Maduro pa e fiesta por sigui.
Pueblo kier sa e motibo real dicon kier core cu Haime Croes. Cua Minister di MEP no gust’e, cua Minister di MEP el a para y cua Minister di MEP ta den ansha di morto pasobra el a tuma placa den campaña di sponsor y awe te ainda, cu Gobierno na vispera di cay, ainda e no por cumpli. Den ansha di morto su tata a cuminsa yora caba den prensa pa traha cu AVP. “Keda leu di nos, sigui den Boso maneho corupto y di horta tereno di Arashi for di pueblo pa por complace Boso hendenan”, asina Marlon Sneek a termina bisando.
Un fecha pa yama e reunion publico relaciona cu posibel desconfiansa den Minister Marisol Lopez-Tromp no tin ainda. Henter Aruba ta den suspenso pa scucha kico mas e Minister a descubri ora el a asumi e funcion despues cu Otmar Oduber a baha. Locual mester corda tur hende ta, ora Otmar Oduber a tuma retiro, cu e mesun Evelyn Wever a asumi e puesto pa un luna y mey, prome cu Marisol Lopez a logra pasa “screening” pa bira minister. Ta kico tur Evelyn Wever a regla den e luna ey? Pasobra e siman aki a nota caba cu buefete di abogado di su tata mesora a anuncia Bar y Restaurant na Lago Colony. Ta bale la pena sigui cu e reunion awo pasobra ta hopi cos di papia tin!
