KRALENDIJK, Bonaire
Despues di a studia e 20 ofertanan ku nan a risibí pa formulashon di e Masterplan 2030, e komishon independiente di selekshon a traha un preselekshon di 3 kandidato tòp di kua a someté nan oferta na un di dos evaluashon mas den detaye ainda. A base di esei a disidí pa duna e tarea na MarkStra Caribbean.
‘E komishon di selekshon a keda impreshoná pa kalidat di e ofertanan. Pa e motibu aki no tabata fásil pa hasi un eskoho. Sin mas nos lo por a konfia hopi di e personanan ku a kai afó ku e tarea, pero ta un so nos por a apuntá i esei a sosodé den unanimidat’, sigun e Tim di Masterplan. E komishon tabatin un base amplio ku representantenan di komunidat boneriano, ekspertonan hurídiko i finansiero i un delegado di ministerio di Asuntunan Interno i Relashonnan den Reino. E ofisina HIS (Haagse Inkoop Samenwerking) ku ta spesialisá den destaho di gobièrnu a guia e proseso di selekshon.
E ganadó MarkStra Caribbean mester sòru pa e Masterplan 2030 ta kla dia 10 di òktober pa present’é na pueblo. Pa logra esaki e ophetivo mester ordená e aporte ku a drenta durante e hopi seshonnan for di komunidat i hinka esaki di tal manera den otro ku e ta bira un totalidat lógiko. Enfátikamente no ta e intenshon pa añadí ideanan propio, pasobra e Masterplan mester reflehá kon nos pueblo ke pa futuro di Boneiru lusi. Pa por evaluá tur e ideanan ku a bini dilanti desde e konferensia di ‘kickoff’, durante e próksimo simannan ainda 10 asina yamá ‘seshon di enfoke’ lo tuma lugá, ku ta varia di ekonomia duradero, agrikultura i peska, infrastruktura, naturalesa i medio ambiente te ku deporte.
