Proyekto piloto pa marka karetera
Riba e kaminda di Rincon pa Playa, direktorado di Espasio i Desaroyo (R&O) di Entidat Públiko Boneiru (EPB), ku ta kai bou di responsabilidat di diputado Hennyson Thielman, den fin di siman a laga ehekutá un proyekto piloto ku e meta pa alsa siguridat i drecha visibilidat den tráfiko. Riba enkargo di e direktorado, e kompania D.S.G. Consultancy a pone marka di kaya solar, asina yama ‘cat eye’ (wowo di pushi) i reflektor riba e kaminda.
Si e proyekto piloto aki duna resultadonan eksitoso, lo sigui pone e markanan di kaya riba otro kareteranan tambe, pa asina oumentá siguridat den tráfiko riba e kareteranan riba nos isla, diputado Hennyson Thielman a duna di konosé.A kuminsá ku e proyekto piloto riba e karetera ariba menshoná, e parti na altura di e bògt di Kaminda Onima i na altura di Mangasina di Rei na Rincon. E markanan di kaya, ku ta traha riba energia solar, den skuridat ta iluminá rant di e kaya, loke ta duna usuarionan mihó visibilidat den oranan di anochi.
Diputado Thielman ta kontentu ku ehekushon di e proyekto akí. Di e forma akí ta trata na reakshoná adekuadamente riba e konstante gritunan di den komunidat pa hasi algu pa drecha siguridat den tráfiko riba nos isla. Si esaki logra ku e proyekto akí, e lo sigui riba otro kareteranan tambe.
Durante e trabounan den fin di siman, empleadonan di e departamento di ‘Buitendienst’ di R&O tambe a yuda duna un man na e kompania. Pa diferente proyekto piloto EPB ta hasi uso di diferente kompania. Ta importante pa e departamento di ‘Buitendienst’ traha huntu ku e kompanianan akí, pa asina nan tambe haña eksperensia den ehekushon di diferente trabou, diputado Thielman a bisa.