Mark Rutte a retira di politica cu sentimentonan mixto despues di 13 aña como prome minister di Hulanda

Parti pafo di Parlamento na Hulanda, lider di VVD Mark Rutte a papia amplio cu prensa tocante su decision cu e ta retira di politica. Tambe el a recorda e momentonan mas importante cu e tabata Prome Minister y e puntonan mas abou cu por a pasa pero tambe riba su relacion cu politico di partido di oposicion.

Na salida e politico a duna di conoce cu e la pensa hopi prome cu e la tuma un decision. E mandatario ta kere cu a yega e momento pa laga los y e ta sinti bon. Sinembargo e paso aki ta wordo haci cu hopi emocion y hopi sentimentonan mixto pero na mes momento partido mester tuma un decision kende lo bira prome riba lista di partido di VVD.

E la ser pidi pa pensa bon prome cu e la tuma e decision y esey ta loke e la haci tambe y na unda cu a duna su ultimo palabra cu lo e no sigui mas den politica. E ta kere cu e tabatin un bunita carera den politica pa 17 aña largo unda cu e ta na cabes y ta trek e partido y e ta aprecia y ta gradici di tur e sosten cu e la ricibi di VVD y tur esunnan cu a vota pa su persona.

Ex prome Minister di Hulanda Mark Rutte ta duna di conoce cu e ta hopi orguyoso di partido VVD y ta spera cu Hulanda por sigui duna VVD e posibilidad y duna e partido e mandato completo pa asina por traha riba e progreso y e situacionnan dificil cu Hulanda ta den dje na e momentonan aki. Mark Rutte pa 13 aña tabata Prome Minister di Hulanda pa VVD. E decision cu a stop den politica no tabata cu e la keda puntra pa bay , pero cu e mes a tuma e decision di sali for di politica  y ta kere cu ta e momento corecto. Foto Niewe Revu