Durante tratamento di caso Diamanta siman pasa den Corte, a bini dilanti algun punto cu defensa di e acusado principal Alan Howell a trece dilanti, esta mr. Doris Canwood. Loke e abogado a cuestiona ta con bin cu e colega di Howell, esta Marisol Lopez Tromp, tambe a tuma placa cash di e fundacion pa paga su ruman, y e no a wordo investiga of persigui.
Por corda cu Lopez Tromp a wordo interoga relaciona cu e caso aki tambe.
Den e dossier Diamante ta para cu un biaha a lanta e suma di 50 mil florin for di banco y cu esaki a bay pa paga cierto gastonan. Mita di e suma aki a wordo entrega cash na e parlamentario bakia Marisol Lopez Tromp. E tabata un placa cu e fundacion, supuestamente, debe pa salario di su ruman muhe. Aparentemente prome cu e fraccion a haya su placa, el a paga salario di su ruman muhe Lelicia Tromp, kende tabata yud’e cu su actividadnan di relacionnan publico y alabes tabata director di noticia na TeleAruba, cual ta un conflicto di interes total.
Loke el a bisa cu esaki tabata loke el a paga su ruman den e periodo di 1 januari 2018-31 october 2018 pa Content Management van Social Media en Public Relations & Media Coverage.
Esey no tabata e unico biaha cu e Parlamentario bakia aki a haya placa cash for di e fundacion, pasobra e lo a uza su fondonan pa haci pago cu aparentemente mester a wordo cubri door di e fundacion. Na un otro ocasion el a exigi pa partido pagu’e un suma di 5 mil florin di un curso, pero cash. Abogado Canwood a bisa of a señala partinan den e dossier di Diamante cu ta pasa cu e tesorero a saca 5 mil florin for di cuenta di e fundacion na Banco pa e Parlamentario Lopez Tromp. “Mester a paga sra. Lopez Tromp e suman aki relaciona cu gastonan haci pa un biahe y estadia di un curso derecho di mucha. E suma, riba peticion di e parlamentario aki a wordo paga cash, segun mensahenan di whattsapp. Van Putten a declara cu Lopez ya adelanta pago di e gastonan aki su mes, pero e curso no a tuma luga mesora debi na COVID na Hulanda. Tabata urgencia pa haci e pago na sra. Lopez Tromp, pasobra e siguiente siman e lo mester a bay ocupa e puesto di minister. Sr. Lopez no a duna mas detayes di e curso.” Esaki ta para den e procesverbaal di e caso.
E abogado a bisa cu nan ta cuestiona e forma con OM ta midi cu dos midi. Di con no a persigui Marisol Lopez Tromp. Mas pasobra Lopez Tromp NUNCA a entrega TUR factura di e placanan cu el a ricibi cash.
Un politico manera Lopez Tromp, pa su añanan den politica, funcionnan cu el a ocupa como Parlamentario y Minister, y cu tabata ambiciona pa ocupa e funciona di Ombudsman, sa masha bon con un administracion mester ta hinca den otro pa cumpli cu leynan. Casa cu un homber di cifras mas ainda mester ta consciente cu transaccionnan cash awendia ta lanta hopi pregunta.
Banda di esaki, e politico ta papia hopi di integridad, di ta un luchado pa cana e caminda rector, pero ta e mesun persona cu ta paga su ruman muhe cu placa cu e fundacion ta haya for di Parlamento, sin ningun a tende kico ta tur e trabounan cu e ruman a haci. Pues a beneficia su mesun ruman muhe, kende tabatin un compania, cu puntrando rond niun hende sa di dje, y no a menciona tampoco ta cuanto cliente e compania di su ruman aki tabatin.
Pues Marisol Lopez Tromp no a duna e miho ehempel ora cu a haci uzo placa di Parlamento y riba dje no tabatin motibo pakico e pago na dje mester a wordo haci cash enbes via di transferencia.
