Ex lider y ex Minister di POR, Otmar Oduber a habri afo contra di su ex colega di partido blauw, Marisol Lopez Tromp pa un keho cu e lo a entrega contra di su persona y cu awor ta forma parti di acusacionnan presenta pa ministerio publico.
Desde cu Marisol a presenta e acuscionnan contra di su ex lider Otmar Oduber y despues el a wordo baha como Minister pa un gobierno di su propio partido POR, nunca mas e lider di MAS a bin dilanti y duna informacion na pueblo kico ta kico di su acusacionnan.
Tempo cu el a wordo mal cori pa su propio gobierno, el a bin pafo y bisa cu e no por bisa mucho ya cu tin un investigacion andando pero nunca mas el a bin dilanti y informa pueblo di loke el a considera actonan di corupcion.
Caso Flamingo ta den pleno investigacion pero te awe ainda e lider di MAS no a bin dilanti y bisa pueblo kico ela descubri, hasta despues cu su ex colega di partido y di conseho di minister, Otmar Oduber, a acusa su persona di entrega di acusacionnan falso contra di su persona.
E ex politico Oduber tambe na dos ocasion a mustra cu henter e acusacion di Marisol contra di su persona, a sosode despues cu el a wordo baha como minister pero e lider di MAS no a ni reacciona riba e insinuacionnan di Oduber.
Si Marisol kier papia di transparencia, e kier papia di integridad, laga e mes cuminsa duna pueblo transparaencia riba e casonan di corupcion cu el a descubri tanto den otorgamento di tereno di ex Minister Otmar Oduber como e maneho cu el a hiba cu Serlimar.
Awor Marisol ta acusa Glenbert Croes cu e tin obligacion di informa Parlamento riba cosnan cu a pasa den DIMAS y e decision di Corte den e suspencion duna dor di Minister Glenbert Croes pa loke ta director di DIMAS, esta Kathe Paskel pero Marisol mes no kier duna pueblo ningun informacion di loke el a descubri di loke a pasa tanto na Serlimar, na DIP y cu otorgamento di tereno, caminda hasta el a bisa cu tin mas minister envolvi.
Awe Marisol ta sinta manera un reina di beyesa hungando bunita, hungando e bon politico pero lubidando por completo cu e tin un pasado politico cu e no por libra su mes di dje.
E lider di MAS ta papia cu ta bon pa Hulanda bin pone ordo, pa drecha cosnan cu a bay robes den pasado den maneho di e pais pero ta bon pa mustra Marisol Lopez Tromp cu su persona como politico, a goberna e pais aki pa 16 aña largo y nunca e tampoco a mustra boluntado pa drecha loke awe e ta bisa a bay malo.
