Marisol Lopez Tromp a yega Gobernador cu un stapel di papel cu e no por a carga su so. Pero nada di esaki no tabata prueba pa Hues Comisario prolonga detencion di exlíder político Otmar Oduber.
Ta parce cu e declaracionnan cu Lopez Tromp a entrega di ambtenaarnan no a yuda den e denuncia cu el a haci. Nada di loke el a bin ta papia di dje no tabatin base ni proba pa Hues Comisario dicidi cu Oduber mester keda cera. Loke e funcionario a haya su dilanti tabata nada.
Nada di loke cu Fiscal a trece dilanti durante e sesion pa prolongación di Otmar Oduber tabata prueba pa mantene deteni.
E gran pregunta ta si Flamingo por sigui desaroya of te aki e storia a yega despues cu tabatin masha grito di e exminister y actual Parlamentario Marisol Lopez Tromp. Si di verdad su gritonan di denuncia tabatin base of ta simplemente un teatro den parlamento y of popularidad cu e kier a crea cu manipulacion pa por haya voto , e mester a entrega e denuncia bon prepara y hinca den otro, Ta parce, según tur e señalnan aworaki, cu tur cos tabata manera un venganza contra su excolega di partido Otmar Oduber.
Cu e desaroyo nobo den e caso aki, e credibilidad di e político y líder di partido MAS, esta Marisol Lopez Tromp, ta cay te na suela. Ken por kere despues di tanto fanfaria y awo Hues Comisario ta bisa cu nada di loke a presenta na dje tin peso pa un persecución penal.
Sinembargo Marisol Lopez Tromp Lider di Mas actual, ta conoci pa su teatronan politico y su ganjamentonan di denuncianan falso contra otro politiconan den pasado tambe. Ainda ta corda fresco den memoria con e la haci denuncia falso contra ex politico Chris Dammers di AVP e tempo aya cu Marisol Lopez Tromp tabata presidente di Parlamento, e organo di mas halto di Aruba. Algo cu sigur comunidad di Aruba mester tene bon cuenta cu ne kende e mester kere y confia cu su voto.
Den e caso recien di 18 di Mei, unda huez comisario mester a evalua si ta tene Otmar cera, a bin sali mas informacion na claridad di e caso:
Loke ta hala atencion ta cu di Caso Flamingo, cu ta over e keho di BCI-polis, a bini aserca otro caso, cual ta trahadornan spirito, cu ta e denuncia cu Marisol Lopes Tromp a haci contra di su ex lider.
Loke a bin sali na claridad, ta mustra cu den ningun di dos caso, tin prueba cu Otmar a comete delito. Esey ta palabranan di huez comisario. A overhoor Otmar 7 bes den 10 dia, solamente riba supuesto trahadornan Spirito.
Sinembargo pa e caso di tereno, a bin sali na cla cu den su file, no tin nada. Solamente un “storia” di BCI, pero sin ningun prueba. Aki ta prueba un biaha mas cu tur e teatro cu Marisol Lopez Tromp a bin ta haci perhudicando su propio exlider di Partido ta papia hopi di kende ta Marisol Lopez Tromp como hende. Huez Comisario a bisa cu e no por usa e keho di BCI pa sigui tene Otmar cera y pa colmo no tin prueba pa substancia e keho di BCI.
E desicion aki di huez comisario ta duna e caso full un buelta; Di loke a spera di ta corupcion cu tereno, a bin sali na cla cu e file di Ministerio Publico ta chikito, sin nada relevante. Sinembargo e caso ta habri ainda y e desicion aki no nifica cu e caso a cera, e investigacion ta sigui, pero e ta duna un indicacion si, kico tin.
