Como politiconan nos ta buscando pa drenta Parlamento y den gobernacion den e siguiente eleccion dia 25 di Juni. Cada un di nos cu a drenta e arena politico tin nos areanan den cual nos tin nos experticio y interes pa desaroya y mehora nos pais. Como politiconan nos ta posiciona nos mes como lidernan den communidad. Lidernan cu tin e deseo pa aporta y yuda nos pais progresa.
Nos mester corda como lidernan cu tur locual cu nos ta haci lo forma un bon of mal ehempel pa esnan cu ta wak, scucha y sigui nos. Nos ta den un eleccion crucial. Mas cu nunca nos mester realisa, cu si nos papia di innova, desaroya y transforma nos pais, nos mester cuminsa modela y encarna esaki tambe. Nos como politiconan mester cuminsa duna e ehempel den tur loke nos kier emprende. Si nos kier cambia y transforma Aruba, nos ta papiando sigur di practica un politica y gobernacion riba un nivel halto, pa asina na tur momento nos ta comunica un ehempel ideal cu pueblo por sigui.
Aki nos ta papia cu un lider mester tin e caracter pa por traha den ekipo pero tambe bao presion cu un bon actitud y dominio propio. Pueblo no ta djis buscando hendenan cu conocimiento, sino tambe cu caracter, curason y pasion pa nos pais y pueblo. Lidernan cu un caracter solido, cu por duna cara, y contesta preguntanan dificil cu gracia. Lidernan cu tin e capacidad pa confronta e retonan enorme cu nos pais tin. Lidernan cu ta dispuesto pa duna cuenta di nan accionnan.
Esaki ta posible solamente si nos como lidernan duna e ehempel den e forma con nos ta dirigi na otro y con nos ta expresa nos mes. Esaki ta posibel si ta stop di promete cosnan djis pa gana voto. Esaki ta posibel si ta stop cu practicanan pa cumpra voto atraves di fabornan politico. Esaki ta solamente posibel si ta stop cu gañamento y crea narativanan falso pa manipula e masa na bo fabor. E generacion aki ta exigi y ta merece lidernan di capacidad, experiencia y cu tin e curashi di cana den integridad na tur momento. Liderasgo cu ta promove y ta para pa un bida di transparencia y rectitud. Esaki ta encera cu mester bini mas sinceridad y humildad den politica. E pueblo merece un liderasgo cu ta tribi di comunica e berdad na e pueblo cu e obhetivo di demostra transparencia.
Liderasgo autentico ta busca pa uni pueblo. Liderasgo autentico ta construi brugnan strategico cu personanan cu ta dispuesto pa lucha pa nos pais, poniendo e interesnan di nos pais prome. Nos pueblo ta buscando lidernan cu tin e curashi y conviccion pa para pa loke ta corecto. Lidernan cu ta dispuesto y cu ta compronde cu e tin e deber di produci en bes di promete so. Liderasgo cu ta transparente, incansable y cu ta duna cuenta di su accionnan sin sconde nada. Lidernan cu tin un codigo di conducta halto.
Ami, Marco Berlis, Candidato number 17 riba e lista prestigioso di Mep, ta trahando 16 aña caba den e area social y spiritual incansablemente. Cu amplio experiencia y capacidad profesional pa traha den e reforma di nos pais Aruba. Nos ekipo Movimiento Electoral Di Pueblo Mep ta un ekipo solido y cu a demostra capacidad, seriedad y pasion autentico pa pone nos pais na prome lugar. Un liderasgo cu ta pone e ser humano central. Huntu cu bo nos por avansa atrobe den 2021-2025. Huntu cu bo nos lo sa di guia nos pais y posicione den un lugar di prosperidad y di oportunidad atrobe. Vota conciente dia 25 di Juni, Vota Marco Berlis. Un lider cu lo lucha pa un politica y liderasgo di integridad y transparencia! Un lider di caracter, pasion y determinacion pa hiba nos pais den un era di oportunidad y progreso. Danki di antemano pa bo apoyo y sosten!