“Piar al Panteón” ta un rekonosementu máksimo di pais ruman Venezuela pa e genio patriótiko yu-di-Kòrsou General en Hefe Manuel Piar. Ta un akto ku ta toka Kòrsou na promé lugá komo pais sentral i tur yu di Kòrsou di tur desendensia komo abitante i komo kompatriota di Manuel Piar. Manuel Piar ta un genio militar nato i legítimo di suela di Kòrsou ku ta forma parti importantísimo di nos historia. Su heroísmo a kuminsá aki na Kòrsou ku su gran bataya kaminda el a derotá sòldanan ingles i frustra nan intento violento pa poderá di Kòrsou. E heroísmo di e gran yu di Kòrsou aki a kontinuá después na Venezuela kaminda el a liberá Guayana den e gran Batalla de San Félix. E gueriyero inmortal Piar tabata tin e gran kapasidat i abilidat pa uni esnan ekskluí: indígenonan, afrodesendientenan i hende muhé, den e guera di liberashon.
Ora ta papia di General en Hefe Manuel Piar ta prohibí pa nos lubidá i ninga loke ta di nos. Nos no por ninga loke grandinan a logra. Nos no por lubidá ni neglishá loke kapitan Tula, Almirante Luis Brion i General en Hefe Manuel Piar a nifiká pa e lucha eroiko, antikolonial di liberashon i emansipashon pa Kòrsou, Caribe i Sur America.
E gobernantenan aktual yu di Kòrsou a defroudá i no a mustra kara ora a entregá tera sagrado na Venezuela simbolisando e érue Piar. Nan no tabata t’ei. Dia 28 di aprel próksimo ta tuma lugá e akto seremonial na Caracas. E dia ei lo uni Manuel Piar ku otro érue yu di Kòrsou Luis Brion den Panteón Nacional na Caracas. Dos yu di Kòrsou den panteón huntu ku e Libertadó Simon Bolivar.
Nos gobernantenan máksimo lo t’ei? Nan lo mustra kara? Nan lo t’ei pa presensiá e akto máksimo aki di rekonosimentu?
Movementu Kousa Promé ta opiná ku gobièrnu di Kòrsou mester hasi akto di presensia. Ta nan obligashon komo nos representante, pa t’ei pa rekuperá e eror grave ku nan a kometé dia 11 di aprel último na siudat Bolivar na e akto konmemorando e gran Batalla de San Félix. Pa Kousa Promé Kòrsou mester partisipá ku efektividat, outoridat i ku orguyo komo yu di Kòrsou. Mester tin diskurso serio, profundo i elokuente kompañá ku demostrashon bibu di e kultura monumental di pais Kòrsou. Luego enkargá historiadó i sientífikonan kurasoleño den unión ku esnan di Venezuela ku e tarea pa kompletá e historia di Manuel Piar ku e parti heroiko di Piar aki na Kòrsou promé ku el a lucha na Venezuela. Laga nos ta kompletu i desididu i ban kompletá e historia di Piar. Pa nos Piar ta drenta Panteon Nacional ku su historia kompletu inkuyendo e inisio di su heroísmo aki na Kòrsou.
Finalmente Kousa Promé ta konsehá gobièrnu pa konstruí un mousoleo aki na Kòrsou kaminda ta dera simbólikamente tres érue kurasoleno: Kapitan Tula, Almirante Luis Brion i General en Hefe Manuel Piar.
