ORANJESTAD,Aruba
Tumando na cuenta e cifranan creciente di contagio local cu COVID-19 y cu esaki tambe a afecta trahadornan den Departamento di asuntonan nautico di Aruba, esta Directie Scheepvaart, Minister di Transporte, Comunicacion y Sector Primario, sr. Chris Romero ta introduci un maneho temporal pa botonan local, como tambe pa e proceso di renobacion di permiso pa nabega den awanan di Aruba (vaarvergunning).
Considerando e necesidad pa mantene actividadnan maritimo local, especialmente cerca esnan cu ta depende di piscamento como nan sosten financiero, e Titular di e Carteranan di Transporte, Comunicacion y Sector Primario a determina un maneho temporal pa loke ta trata e ‘vaarvergunning’ rekeri pa nabega den nos awanan. E maneho nobo y temporal ta apunta cu e periodo di valides di un ‘vaarvergunning’ cu a of ta bay caduca den luna di september, lo keda automaticamente prolonga cu un periodo di 14 dia cuminsando di inmediato. Esaki ta nifica cu propietarionan di boto por nabega pa 14 dia sin tin mester di tramita un ‘vaarvergunning’ nobo.
Mester remarca cu no mester acudi na Directie Scheepvaart Aruba (DSA) pa haci ningun tramite, como cu e ‘vaarvegunning’ actual ta keda cu valides pa 14 dia sin importa cu e ta caduca. Duespues di e 14 dianan menciona, por tuma contacto cu Directie Scheepvaart Aruba (DSA) pa un cita nobo.
E maneho nobo y temporal menciona lo por wordo adapta segun e desaroyo di e crisis actual relaciona cu e COVID-19. Segun e circumstancianan reinante mehora, lo introduci cambio si ta necesario.
