ORANJESTAD,Aruba
Mas cu dos aña den e posicion di Minister di Husticia pero ainda Andin Bikker no por haci algo pa mustra su vision cu semper el a soña di tin y tur cos cu el a priminti pueblo cu e lo bay haci asina cu e huramente como Minister.
Arthur Dowers miembro di fraccion di AVP ta mustra cu e unico excusa cu Minister Bikker tin pa su fracaso, ta di bisa cu ta un ‘herencia’ el a haya caminda e no por regla nada aworaki.
“Andin Bikker ta bay cumpli tres aña como Minister di Husticia pero ainda nada di un maneho nobo y diferente.
Minister Bikker continuamente ta bisa cu e ta haci tur cos fragmatico, cu e tin solucion pa tur cos y cu e lo no bay inventa ningun wiel, pa motibo cu tur problema caba tin solucion.
E minister aki tin tres aña caba den gobernacion y di tur problema cu el a crea cu su maneho, e no a haya solucion pa esakinan.
Si tene cuenta cu e Minister aki ta bin pafo y papia di un herencia di brandweer, ta bon pa mi persona recorde un rato cu tempo cu mi persona a bira minister di husticia, nunca mi a usa e excuus di a hereda algo di e maneho anterior.
Den e prome siman despues di huramente como minister di husticia, mi a haya un sindicato di trahadonan di cuerpo di bombero dilanti porta di mi oficina, masha rabia y protestando cu tur e añanan cu MEP tabata gobernando, nunca a percura pa brandweer haya ningun material, ningun auto nobo of mehoracion di salario.
Gobierno di AVP a traha hopi duro e tempo aya y e herencia cu nos a laga pa Andin Bikker tabata cu nos a percura pa despues cu pais Aruba ta existi 25 aña, pa brandweer tin 24 auto nobo pero nunca Bikker a papia di e herencia ey.
Sinembargo for di dia cu Bikker a sinta como Minister, el a descuida tur cos di brandweer y no a presenta ningun maneho di mantancion di material di brandweer y awe nos por a compronde cu ta cu pif paf tin cu cende autonan di brandweer, loke sin duda ta un berguensa grandi.
Nunca Bikker a bin dilanti y bisa cu gobierno di AVP a drecha e ‘rechtspositie’ di brandweerlieden pa di e forma ey e no tabatin e dolor di cabes ey mas, tampoco el a bisa cu el a hereda na brandweer cu tur e autonan a wordo ‘refurbished’ cu ta otro dolor di cabes cu el a scapa di dje.
Pero ora cu Bikker bin como minister arogante, cu bo sa tur cos tur cos miho cu tur hende, anto e ta sinta como minister casi tres aña largo y awor cu palo ta hala cune, Bikker ta pidi pasenshi pa motibo cu su prioridad tabata di percura pa bin c’un helicopter.
Un helicopter cu ta costa e pueblo aki 2.5 miyon florin pa aña, pues esaki ta nifica cu e lo costa en total 10 miyon florin, anto e ora Bikker tin cu puntra su mes cuanto material e por a cumpra pa cuerpo di bomber cu e suma di placa aki.
Pa colmo un helicopter cu ta djis bula 2 bes pa dia 15 minuut y pa colmo minister Bikker a bira pone e helicopter aki den kazerne di brandweer, pues no solamente cu Bikker no a haci nada pa brandweer, awor nan a haya un bofta den cara tambe ora cu a pone e aparato aki den hangaar di brandweer.
Loke ta ainda mas tristo ta e hecho cu ta un compania priva a staciona su helicopter riba tereno di gobierno, caminda gobierno den nomber di pueblo ta pagando aki pa un helicopter cu no ta ni di pueblo ni di gobierno.
Tur hende por imagina nan mes e nivel di sinberguensura cu tin den e caso aki ya cu ora cu a scucha e expresion di ‘seal the deal’ tin cu punta ta kende ta doño di e helicopter y ken su interes ta wordo sirbi na momento cu ta paga servicio di seguridad di pais Aruba, pa cuida un cos cu no ta di nos.
E cos aki ta hopi fishy y Minister di Husticia Bikker tin cu duna cuenta ta di con e ta protegiendo y ta gastando tanto placa asina den un producto cu no ta cumbini pueblo den nada, pero na momento cu tin un candela grandi den e pais aki, ta core riesgo cu mester core bay cumpa pof paf na chines pa drenta bou auto y spuit pa e por start pa e ora bay paga un candela.
Un cos nunca antes bisto y ta un berguensa grandi y Minister di Husticia mester duna cuenta di loke ta pasando y nunca por Sali bisa cu mester tin pasenshi,” Parlamentario Arthur Dowers a declara.
