Den e konferensia di prensa di awe, djabièrnè 10 di febrüari 2023, diputado Hennyson Thielman a duna un aktualisashon tokante e ‘maneho di 1 barku pa dia’, ku ta enfoká riba un mihó eksperensia pa turistanan krusero i habitantenan di Boneiru. Intenshon di e maneho di maksimalmente un solo barku krusero grandi pa dia, ta pa logra vários mehorashon pa Boneiru. Mediante dekonsentrashon di e kantidat di bishitante, e servisio i eksperensia di e bishita na nos isla ta mehorá. Tambe Boneiru por atendé den un forma mas mihó ku e kantidat di barku di karga ku a oumentá, entre otro pa motibu di e kresementu fuerte di e kantidat di habitante, i empresarionan por duna mas servisio na e bishitantenan. Banda di esaki ta aliviá tambe e preshon riba Boneiru su infrastruktura.
E ‘maneho di 1 barku pa dia’ ya kaba a drenta na vigor for di aña pasá, komo resultado di e Plan di Rekuperashon di Turismo, sinembargo tin algun dia ainda e aña akí ku mester kumpli ku sierto kontratonan. For di meimei di luna di aprel esaki práktikamente no ta e kaso mas. Sí t’asina ku ta pèrmití barku chikitu ku ménos di 700 pasahero komo di dos barku. A papia tambe tokante revishon di e kriterionan i eksigensianan pa hasi reservashon den haf. I alabes a konsiderá sierto medidanan di stimulashon pa motivá liñanan krusero pa bini den ‘low season’.
Dia 8 di febrüari Tourism Corporation Bonaire i Entidat Públiko Boneiru a yama bon biní na un delegashon di gerensia di Carnival Cruises na bordo di Carnival Horizon. Meta di nan bishita tabata pa haña un mihó bista di vishon di nos isla, turismo di kalidat ku tiki impakto i un strategia di marka koherente ku enfoke riba eksperensia di bishitante. Di su parti Carnival Cruises Lines na bordo a laga interesadonan, entre otro partnernan di medionan di komunikashon, partnernan direkto for di industria krusero, funshonarionan di haf i gobièrnu, sera konosí ku nan maneho avansá di medio ambiente i resiklahe i un seshon amplio di pregunta i kontesta.
‘Ku e rumbo akí nos ta mehorá e balor agregá pa turismo krusero na Boneiru, loke ta kontribuí na un bishita di ripitishon i mas sèn ku kada turista ta gasta. Tambe tin mas espasio pa transporte di karga pa e suministro nesesario di merkansia pa Boneiru. Esaki ta resultá den un ambiente mas agradabel i mas seif den i rònt di haf di Boneiru, un imágen turístiko mas mihó di Boneiru i disponibilidat di merkansia pa empresanan i habitantenan di Boneiru’, segun diputado Hennyson Thielman.