Ku 13 voto pro i 0 kontra
Nos ta felisitá Giselle Mc William ku e logro aki
MAN-PIN ta kontentu ku e lei di plèstik a keda aprobá dor di Parlamento. Despues di un trayekto largu porfin e lei aki a keda aproba. Nos ta felisitá Frakshon di MAN liderá pa sra. Giselle Mc William ku a hasi un bon trabou den Parlamento pa defende i kontesta tur pregunta di miembronan riba e proyekto di lei.
E lei aki sigur tin benefisio pa medio ambiente i miho salu di nos komunidat. Korsou ta bira un di e hopi paisnan mas den mundu ku a dal e stap na baha uso di plestik. Pa MAN-PIN nos ta kontentu ku pa e lei aki a logra konsenso i mira e balor i importansia pa nos dal e stap aki komo pais.
Na e momento aki e bala ta den man di gobièrnu pa hasi publikashon di e lei aki pa e periodo di transishon i pa despues di 9 luna e lei drenta na vigor. Ta importante pa di parti gobièrnu tin un bon kampaña di informashon pa komunidat riba e lei aki.
Frakshon di MAN den Parlamento tin mas proyekto di lei ku ta kla pa tratamentu manera Penshun General pa trahado, kambio di lei di Sueldo Minimo pa hoben kaminda ta eleminá deskriminashon. Nos ta supliká Presidente di Parlamento pa pone e leinan aki tambe riba agènda pa asina alsa kalidat di bida di nos pueblo.
