Mal echo di Managment team esun cu ta tuma decision di kico operacion (Bedrijfsvoering) mester bestel pa KPA

No ta cuestion cu ta SPA ta inventa pero e ta para claramente den e vest mes

Sindicato di Polis Aruba (SPA) no t’ey pa discusion entre gobierno di Aruba y leiding di polis, pero loke cu no a wordo bon haci mester wordo bisa y acepta cu no a cana manera mester ta.

Presidente di sindicato di Polis Rodney Solognier a tuma nota di e reaccion di minister di husticia Rocco Tjon riba Bulletproof vest,Segun e sindicato minister tin rason cu SPA a firma pa e vestnan, pero a firma pa un vest di miho calidad y a ricibi un vest di menos calidad.

Ban pone cu e vestnan hipoteticamente ta un bon Bulletproof vest, pero na mes momento a haya nan sin e panel di hero cu tur vest mester bin cu ne. Den e vest nan mes ta indica cu nan tin mester di e panelnan, aki caba cu e discusion  sea e vest ta bon of e ta malo, na e punto aki so e vest a baha di calidad.

E Bulletproof vest no tin e panel pa e defensa. No ta cuestion cu ta SPA ta inventa pero e ta para claramente den e vest mes unda cu e compania di e Bulletproof vest mes ta indica cu nan no tin e panels nan necesario pa defensa.

Na mes momento sindicato SPA  ta spera cu por yega na un solucion general pa cuerpo policial y pa e polisnan ta bon protegi. Sindicato SPA mes ta di opinion cu no ta minister di husticia Rocco Tjon mes tin culpa den henter e situacion aki , hopi biaha minister ta haya un conseho y  tin tur confiansa cu operacion (Bedrijfsvoering)  di KPA ta haci nan investigacion prome yega na su persona pa por firma pa cosnan por cana.

E minister mes no ta esun cu ta cana busca y haci investigacion kico y cua ta e miho materialnan pa polis, pero mas bien esunnan cu ta conseha ta esunnan cu ta haci e evaluacion prepara y conseha e mandatario cu e material ta esun mas miho pa KPA y asina e minister cu e confiansa ey cu e ta duna na esunnan concerni cu den bista di e mandatario nan ta haci nan trabao debidamente prome cu e yega na mesa pa e por firma.

Loke ta un realidad cu esunnan cu ta opera KPA no a busca e Bulletproof vestnan corecto y adecua, miho bisa e Bulletproof vest cu SPA a firma pe y ta desea, e ora e escogencia no ta corecto.

E managment team ta esun cu ta tuma decision di kico operacion (Bedrijfsvoering) ta busca pa KPA. Sinembargo esunnan cu ta den e curason di KPA , dus cu ta den e operacion (Bedrijfsvoering) di KPA  ningun di nan no ta polis ta trata aki di un trahado social y un persona administrativo.

Den e managment team si, tur ta polis unda cu ta trata di comisarionan cu a traha caya mester a haci un investigacion prome y duna e conseho na  operacion (Bedrijfsvoering) di KPA kico pa conseha minister y pa cumpra pa KPA.

Awo cu e vest nan a yega ta mustra cu ningun investigacion a wordo haci y cu a dies scoge pa e nomber renombra di e vest y consecuentemente no a mira e detayenan necesario y a bin cu un vest cu no ta adecua pa cuerpo policial.

Sindicato di Polis Aruba (SPA) berdad a firma, pero a palabra cierto exigencianan cu e vest mester tin, miho dicho a firma pa un bon categoria di vest pa polis, pero no a ricibi esaki.