Maestronan di Emma School a bay awe tanto sede di gobierno como Parlamento pa un biaha mas expresa nan mal contento pa e hecho cu gobierno ta bay fuseer dos scol di enseñansa special, sin cu a consulta cu nan.
A haci entrega di un manifiesto na ambos organo, pero tambe a logra haya un reunion atrobe cu prome minister Evelyn Wever Croes, kende nan a pidi pa interveni den e plannan.
E maestronan ta bisa cu nan ta preocupa pa motibo cu a traha plan pa fuseer dos scol, y haya solamente un scol catolico di enseñansa special, cu awor ta bay ubica, entrante augustus awo na e facilidad di Emma School na Ayo. Maestronan ta bisa cu nan no tabata envolvi den e plan of preparacion den esaki. No a haya chens pa duna nan opinion.
Despues di a entrega e manifiesto na gobierno, a laga esaki na parlamento tambe.
For di siman pasa caba e maestronan di Emma School a bin ta tene diferente tipo di accion pasobra nan no kier pa fuseer e dos scolnan aki. E mandatario di su banda ta bisa cu un scol ta suficiente pa e cantidad di alumnonan cu tin awo den enseñansa special. E localidad na Ayo tin 17 klas y ta bay haya un modulair cu tin espacio pa tres oficina. Aworaki tin dos facilidad y e espacionan no ta wordo uza debidamente pa e cantidad di alumnonan cu tin. Hopi espacio perdi, mientras cu e scol na Playa aworaki por wordo uza pa un scol di mucho mas alumno. Emma school tin den careda di 87 alumno y SPPF 95 alumno
Mañan e tema aki lo ta riba mesa den reunion di Conseho di Minister.
