Shete luna i mei pasá Daisy Coffie, presidente di M21, na okashon di lansamentu di M21 a bisa e siguiente palabranan: “Nos a lanta den un komunidat kaminda a siña nos pa mira un mundu mas aleu ku djis rondó di nos so. Pa ta konsiente di i pa mustra kompashon pa “strugglenan” di tur hende. Nos a lanta ku e kreensia ku servisio públiko ta un kousa noble i ku e pelea pa hustisia ta tur hende su responsabilidat. Mi tata sa bisa: “No sinta un kaminda i reklamá, hasi algu.” Básikamente mi ta kere e tabata ke men: “Bo tin ku lanta’riba, para riba bo pia i nunka give up e lucha!” I ta e kreensia aki, ku ta te den mi ser ankrá, a inspirá mi pa tuma e desishon pa sirbi mi pueblo. Ta mas o ménos 6 aña i mei pasá, ku m’a kana drenta e sala di reunion di Konseho Insular na Pasanggrahan pa promé bes i a bisa e sinku palabranan ku lo a guia mi den mi karera polítiko: “Daisy Coffie, pa e pueblo!”
Bueno…. Mi tabata sa ku nos sistema polítiko no tabata esun di mas mihó. Pero mi tabata sa tambe, ku polítika tin un impakto profundo riba bida di nos hendenan i ku komo un polítiko un di mi responsabilidatnan ta pa duna nos hendenan seguridat i dignidat. Mi tabata sa ku mi ke a protehá nos pueblo. I mi tabata sa ku e hendenan den nos sosiedat, ku mas ta bira víktima di e sistema, ta esnan sin bos i esnan vulnerabel. I for di e tempu ei, meskos ku awor, mi tabata i ainda ta kere ku no mester laga ningun hende su so den su lucha. Ami ta kere firme, ku kada malu o daño hasí kontra kada un di nos, ta malu of daño hasí kontra nos tur. Esaki ta un punto ku mi a splika hopi bes na víktimanan di malu of daño, hopi bes hasí na nan dor di hende ku nan a konfia. Mi ta rekordá e hendenan aki semper: “Bo no ta invisibel. Nos tur tei pa otro. Esei te poder di e pueblo.”
Henter mi karera polítiko, mi tabatin solamente 1 kliente: e pueblo di Boneiru. Sali na vanguardia di e pueblo ta nifiká lucha na nòmber di e víktimanan di vários inhustisia, kontra probechadónan, kontra silensio inhustu, stigmatisashon, diskriminashon, desigualdat, inhustisia i asina mi por nombra hopi mas….Ta huntu nos mester bai e luchanan aki pa ta sigur ku nos ta gana e bataya òf nos a pèrd’é; pero nos nunka a stòp di lucha pa loke ta di nos, loke nos tin derecho riba dje o loke nos meresé… I p’esei nos ta aki awe. Nos ta aki pasobra nos tin un otro lucha nos dilanti. Nos ta aki, sabiendo ku nos ta na un punto krusial di historia di mundu. Nos ta na un punto krusial di e historia di nos isla. Nos ta aki pasobra e soño di nos antepasadonan i e demokrasia Boneriano ta menasá di kai pèrdè mas ku nunka anterior. Nos ta aki ne momentu aki di tempu pasobra nos mester kontestá un pregunta fundamental: “Ken nos ta? Ken nos ta komo Boneriano? Kiko nos ke?”.
Ta importante pa nos kontesta e preguntanan aki. Pa mundu. I pa otro. Pa nos mes. Akinan i awor unbes. Laga nos nunka lubidá, ku pa loke ta trata asuntunan fundamental, nos tin mas tantu kos en komun ku loke ta dividi nos. Tin ku ta bisa ku di un forma of otro nos mester buska manera di haña e base komun ei. Loke ami ta bisa ta; ku nos tin ku rekonosé ku nos ta pará kaba riba e suela firme i komun ei. Na mi humilde opinion nos lo subi huntu òf nos lo kai huntu komo un pueblo, Si nos ta uní di bèrdat, ningun hende lo por tene ningun otro abou ni atras.Ta trata e orei di lucha pa nos isla ku trato igual, meta kolektivo i libertat pa un i tur. Esei nos ta. I komo tal, awe mainta ta un honor p’ami, pa ta para dilanti di boso, ku un bista kla di e lucha nos dilanti i loke mester hasi, ku fe den Dios Todopoderoso, fiel na mi isla Boneiru, I ku e “fighting spirit” ku mi a heredá di mi mayornan i mi ansestronan.
Awe mi ta aki pa anunsiá ofisialmente e lansamentu di un movementu inovativo ku kua mi ke sirbi e pueblo Boneriano. Mi ta lansa e movementu aki pasobra mi ta stima mi isla Boneiru. Mi ta lansa e movementu aki pa por guia e pueblo, huntu ku e pueblo i pa e pueblo, Mi ta lansa e movementu aki pa lucha pa un Boneiru kaminda nos ta tene nos na nos palabra i kaminda nos ta honra nos promesanan hasí i karga nos responsabilidat. Mi ta lansa e movementu aki pa por lucha pa un Boneiru próspero kaminda tin bienestar na kantidat pa kada un siudadano. Pasobra esei ta nos Boneiru. Esei te Boneiru ku ami ta kere den. Esei te Boneiru ku mi sa ku nos tur ta kere den. I lansando e movementu aki, mi ke bisa lo siguiente: Mi no ta perfekto, Dios Todopoderoso sa ku mi no ta perfekto. Pero mi lo papia semper ku desensia i klaridat moral i lo mi trata tur hende, e pueblo, ku dignidat i rèspèt. Mi lo liderá ku integridat. I mi lo papia e bèrdat. I klaro, nos tur sa ku e kaminda ku mi ta drenta awe aki no t’esun di mas fásil ni lo e no ta fásil. Robert Kennedy a bisa hopi añanan pasá: “Solamente esnan ku tin e kurashi pa riska frakasá lo tin logronan grandi!” Tambe ela bisa:” No ta simplemente liderazgo di nos nashon ta den e wega. Ta nos derecho i responsabilidat pa ku liderazgo moral di e planeta aki pa ofresé un alternativa”.
Pues awe mi ta bisa boso: esakinan no ta tempunan komun i koriente. I e movementu inovativo aki lo no ta unu komun i koriente. Pero esaki ta nos Boneiru. Anto ta keda na NOS, na kada un di nos pa yuda drecha e situashon aktual ku nos ta den. Laga nos rekordá ku den e lucha aki nos tin e forsa di poder di e pueblo. Nos por logra e soñonan di nos mayornan I antepasadonan. Nos por drecha nos Boneiru. Nos por duna nos muchanan e futuro ku nan meresé. Nos por restorá e liderazgo moral. Pues ban hasi esaki. Ban hasié huntu. I ban kuminsá awor. Mi ta invitá bo pa djòin Movementu 21, pa huntu nos ban traha na un mihó Boneiru, un Boneiru próspero ku ta brinda bienestar na un i tur. Abo ta e diferensia!”
Awe M21 ofisialmente ke avisá ku e organisashon ta duna tur hende ku ke yuda traha riba un mihó futuro pa Boneiru, e oportunidat pa hasi esaki. No balotá kiko tur bo por hasi, pa chikitu ku bo granito ta e ta un aporte pa nos drecha loke no ta bai bon aki na Boneiru. M21 ta un organisashon inovativo, dinamiko, demokratiko, partisipativo, inklusivo, ku atenshon pa hóbennan i sosial liberal, dediká na i komprometé ku Boneiru. M21 ta konvensí ku si nos sigui hasi meskos, vota meskos, atendé ku polítika manera a hasi te ku awor: nos lo sigui haña e mesun resultadonan. Wak nos aviso riba medionan sosial. A bira tempu pa hasi e kosnan diferente, di un manera inovativo. Huntu nos ta fuerte, huntu e trabou ta bira mas fásil, huntu nos ta logra. E ora a yega, stòp di papia, ban aktua!
