Luna di September ta luna di prevencion di suicidio y su efectonan riba e salud mental di hoben y adulto. E tema di e aña aki ta “the world is not better without you” unda kier logra concientiza y siña pueblo mas over di e topico di suicidio, con pa busca ayudo, con pa ofrece ayudo y por ultimo con pa ta mas habri pa topiconan vulnerabel.
Aruba ta un isla chiquito berdad, pero esey no ta descarta e problemanan mental cu nos pais ta enfrenta. Tin diferente area unda bo persona por equipa bo mes pa asina compronde y yuda otro of bo mes. Tin pensamentonan vulnerabel manera suicidio cu no mester ta un taboo ni tampoco algo cu nos ta sconde, pero algo cu nos ta abiertamente combersa pa e seguridad di nos cada un.
Siña e señal:
Algo hopi importante pa detecta y yuda un persona y preveni lo peor ta door di siña e señalnan clave cu ta diferencia suicidio y problema nan mental manera depresion y anciedad. Tin un diferencia clave cu ta trek un liña unda un persona tin depresion/anciedad y ora e tin pensamentonan manera suicidio. E señalnan por ta dificil pa diferencia, pero lo tin cierto cosnan cu lo indica e area corecto. Siña e señalnan asina bo por refina e ayudo cu bo lo por duna.
Cierto señalnan por ta combersacionnan y tin biaha por ta chistenan cu semper ta caba na e persona pensando den haci su mes of otro daño.
Por ta momentonan unda nan ta señala cu nan no kier ta niun caminda of rond di niun hende y por ta momentonan cu e señalnan tey, pero nan ta wordo tapa door di otro problema of topiconan.
Siña e terminonan correcto:
Siña e terminonan correcto ora di acerca instancianan pa yuda un otro persona ta hopi importante. Den e mundo di problemanann metal tin diferente terminonan cu ta wordo uza pa describi un persona su estado, asina profesionalnan y personanan den area di prevencion por sa con pa specifica undanan por cuminsa duna aporte y te cuanto nan mester pone aden pa asina por preveni lo peor.
Siña e statisticanan:
Siña e statísticanan ora ta bin na yuda un persona, nos mester ta habri y educa nos mes brevemente prome nos duna un man, pa kico? Pasobra e ta hopi importante cu bo ta siña e manera cu e problemanan aki por evoluciona, pa asina bo por ta mas equipa pa apoya unda e persona tin mester di bo. Compronde kico y di unda y cuanto den e area aki ta un yabi fundamental.
Siña e manera efectivo pa reduci:
Reduci y preveni manera ta stipula ariba. E lo no por pasa si nos no sa e manera correcto y efecto pa yuda un hende. Nos mester sa con y kico mester wordo bisa den cierto momento pa asina bo yuda e persona y no papia sin cu e lo haci un cambio den e persona.
Siña haci preguntanan fuerte:
Haciendo preguntanan profundo nos ta haya sa sigur con y unda e persona su problema nan a cuminsa pa asina nos por purba kibra e lasonan cu e persona por tin cu ta strobando e di wak mas leu y busca cosnan cu ta necesario pe.
Siña na ken mester bai:
Manera menciona ariba bo persona mester siña na unda, kico, con y cuanto ayudo un persona tin mester pa asina busca e personanan equipa pa esaki. Na aruba mes nos tin diferente caminda unda bo persona por bai y tin diferente hende cu bo por acerca. Si bo persona ta pasando door di algo asina cu un otro persona of personalmente.
Yudando otro nos ta sigurando cu e persona aki por mira cu suicidio no ta e final, y cu lo bin hopi mas cosnan grandi y imprecionante den nan futuro, cu nan por acerca y papia pa asina hunto nos bai dilanti. Prevencion di suicidio por sinti manera un tema cu no ta concebi pa añas como isla, pero tin hopi cosnan cu ta pasa interamente den nos comunidad cu si nos siña y ripara señalnan nos lo sa di preveni y yuda otro.