Despues di por a wak e eleccion di Miss Universo 2023 na televishon algun dia pasa, nos curason ta dirigi nos pa papia un crenchi di Buniteza. Mientras otronan ta hasi tur sorto di operacion y cirugia plastico pa mustra mas bunita y mas hoben, nos curason ta sinti lo contrario y nos ta sigui e rumbo di naturaleza cu Lady Ruth su beyeza, cu tin como super ehempel su bunita Mama, Petronilia Mercedes Tromp, cu dia 28 di November 2023 a cumpli 70 anja casa cu e unico amor grandi di su bida Lucas L. F. Bergen. Mi kerida Mama ta un buniteza natural, nos Reina, nos Miss Universo cu nunca a uza make up, solamente un crenchi lipstick de vez en cuando, depende di e occasion. Lady Ruth semper tawata contra eleccionnan di beyeza, pa motibo , cu Dios Creador a crea cada un na un manera unico y special. Mundo ta lora cu su bailenan di asina hopi competencia awendia, riba tur tereno pa midi ken ta mas sabi, mas lihe, mas bunita etc. Tempo mi tawatatin 13 of 14 anja di edad, mi tambe a wordo pidi pa participa na eleccion di Miss Teenage Aruba, pero mi a nenga . Mi no ta gusta pak mi cara cu tur sorto di producto cu ta lagami mustra diferente. Mi no tawata kier pa ningun hende mishi cu mi wenkbrauwnan tampoco. Danki na nos Miss Universo den nos bida, mi kerida Mama, cu semper tawata a la natural, cu solamente un crenchi lipstick y de ves en cuando un tiki poeiroe riba su cara pa varios ocacion solamente. Oh, mi ta gradici mi bunita Mama pa esaki, e ehempel aki, di ta a la natural ! Y awor cu mi edad di dobbel seis, mas mi ta realisa con bunita mi Mama ta cu su 87 anja di edad ! Mas grandi di edad, mas bunita ! Un buniteza cu no tin comparashon. Su sonrisa, su wowonan, su rimpelnan, su cabeinan sinishi cu ta expresa sigur hopi, pero hopi sabiduria, cu ela acumula y gana durante tur su 87 anjanan den Universidad BIDA , te cu awe y cu mas Dios mediante. Diamars dia 28 di November 2023 , mi Mama y mi Tata a cumpli nan di 70 aniversario di boda. Ba lesa bon ! Setenta ! Shete Zero. Zeventig ! Nos a para keto y reflecciona riba e dia aki y hunto den famia intimamente a brinda den oranan di atardi den un forma hopi simpel, pero cu hopi amor y aprecio. Den oranan di mainta nos tawata honra cu e bishita di nos flamante ministro di cultura Sra. Xiomara Maduro y tambe di nos bon Pastor, Pastor Jairo cu a bin reza un bunita oracion di gradicimento cu e pareha Bergen-Tromp cu nan 70 anja casa. Cu hopi gradicimento na nos humilde curason pa e ehempel di union di amor como pareha den bon y den malo. Papa cu su 91 anja y Mama cu su 87. Mientras Papa por ta sinta tras di su laptop ta google y of ordo pieza di auto pa famia y of amigonan, Mama ta ariba cama, lesa corant, wak televishon y of scucha musica hulandes of mariachi. No ta mucho tempo atras cu nos bunita Mama a hanja un stroke cu a afecta un di su pia y un di su brasanan. Ora mi tawata pensa, riba tur nos bendicionnan den nos bida, mi a bin realisa cu asina mes nos Bon Dios tin tur cos den su man. Mi ta wak y sinti mi Mama su buniteza. Mas grandi den edad, mas bunita di paden y pafor. Danki na e carismatico y simpatico, nos bunita Ministro Sra. Xiomara Maduro pa su atencion, amor y e regalo di glas, den nomber di gobierno duna cu hopi carino y danki na nos dynamico Pastor Jairo pa su bunita oracion y palabranan profundo dedica na nos mayornan Lucas y Mercedes Bergen Tromp cu sigur ta inspira nos tur. Nan no tawata kier un fiesta grandi, solamente un brindis cu nan yuinan, nan pareha y nan nieto y nietanan y tin tambe awor e bendishon di tin 2 bisa nieto. Nos ta gradici nos Bon Dios, Su Santunan y Angelnan pa e bendishon grandi aki y cu nos por sigui accepta Su boluntad na tera como na shelo di Un dia a la ves, One day at a time .
Nos sa cu nos niun ta aki pa semper den e curpa aki y cu un dia nos lo ta cu nos Creador di Amor den Reino Celestial. Nos a inspira un poema cortiko, paso, nan bida hunto den union di amor pa asina hopi anja no por wordo expresa nunca suficientemente den un par di palabra so , pero nos ta purba, nos ta sigui nos curason:
Lucas y Mercedes, cu 70 anja di felis bida matrimonial
Cu nan experiencianan unico, profundo, bunita y hopi special
Corona cu 3 yui homber balente, potente y un yui muhe , tur 4 yui sabi y talentoso
Ki dia felis pa ketobay sinti nan pasion den nan zjeitu y nan gozo
Nos Rey y Reina, nos conseheronan, nos ehempelnan firme y fuerte
Papa cu Mama ta nos bendishon di mas grandi, nos regalo, nos suerte
Nos por a desvia di nos caminda algun ves, pero e luz mes a trese y pone nos bek
Nos por a rebeldia un crenchi, pero Jesus mes a proteha y guia nos
Nos por a sigui bayla nos mesun bayle, step by step, pia of man herek
Nos por a scucha den cada bondad di nos mayornan e divino bos
E bos di Dios cu nunca a laga nos mayornana desampara of na caya
E bida humilde, interesante y educativo den nan alma sin faya
Danki Jesus y Mama Maria, Danki Dios pa e amor Cu semper a rondona nos Tata y nos Mama Danki Jesus y Santunan pa permiti nos algun tempo mas cu nan Tur tur cos, segun Bo Santu Boluntad, segun ta skirbi den Bo plant’i man Nos ta stima Mama cu Papa, nos dushi Payo cu nos bunita y dushi Mayo Danki pa stima nos, sinya nos, pa nos ta un parti di E Luz su splendor y su Rayo
Cu amor di Roy, Ruthy, Ro y Lucky y nan famia.
