4 di october 1998 dia cu Divino Niño a wordo corona. Hesus a manifesta su mes na un señora casa y mama di un yiu, yama Valerie, despues e a bin haña dos yiu mas. Un susto grandi pasobra e no tabata compronde ta kico ta pasando. Un si a wordo bisa na e pregunta “Bo kier traha pa Mi y mi Iglesia?”.
Un Vidente a nace, pa ta e mensahero di nos Señor. E coronamento di Divino Niño ta, cu Hesus ta rey di mundo, rey di nos tur y cu den su bista nos tur ta chikito. E bunita regalo aki a wordo ofreci na nos tur pa medio di nos Vidente. Modanza tabata e lugar unda nos Vidente tabata biba y un capilla chikito a wordo construi pa tur esnan cu kier a bishita e lugar pa busca un of otro solucion pa nan bida. Y nos por bisa cu hopi cos bunita a sucede na Modanza entre otro combercion pa Catolico Romano, sanacion, multiplicacion di chuculati pa bisa algun di nan. Mientras cu tur e cosnan aki tabata sucede nos Vidente a cuminsa busca un otro lugar cu Señor tabata preparando ya caba pa varios tempo. Asina mes nos Vidente a core Aruba rond y a termina su biahe riba e tereno di Koyari, unda cu nos Señor a manda su señalnan cu ta esaki ta e lugar cu e kier. Desde e dia ey, Koyari a bira e lugar di Aparicion, oracion y peregrinacion. Antes e lugar aki tabata un cunucu yena cu matanan di fruta y a duna hopi fruta pa e tempo ey, pero awor ta un otro tipo di fruta ta wordo cosecha aki riba, fruta di amor, pordon, combercion pa bisa algun di nan. E crus grandi ta esun cu prome a wordo poni aki riba, pa transforma e lugar aki den e ultimo 24 aña den e paraiso di Señor aki na tera, unda e dos Curasonnan inseparabel ta graba riba e tereno aki pa tur eternidad. Despues di e crus a bin e pedestal di Mama Maria y e prome imagen di La Birgen di Gracia di Aruba, mientras tanto a cuminsa cu e construccion di e Kapel Creacion di Mundo henter. Despues a sigui cu e construccion di e pedestal di Hesus. Un Brasilero a keda encarga pa traha e imagen di Mama Maria y e mesun persona a traha e imagen di Hesus cu ta un replica di e imagen cu tin riba sero na Brazil. Despues a sigui tur e otro pedestal nan cu diferente Santonan riba nan. E imagennan di e Santonan a bin di Venezuela y Colombia, y e imagen nobo di La Birgen di Gracia di Aruba y di Hesus, nos Amigo y Salbador. E prome imagen di La Birgen a bay Washington na Vidente su cas y e imagen di Hesus a haña un otro lugar riba e tereno mes riba un pedestal banda pabou di e tereno. E trabou den e 24 añanan aki tabata inmenso, e principalnan tabata pa converti e hendenan, soluciona problemanan den famia , entre mayornan y nan
yiunan, kita e cadena cu tin e yiunan di Dios mara, baña hende cu awa bendiciona, papia cu e carnenan cu a desvia di e caminda di berdad, yuda hendenan cu ta posei, yuda hende pober, hende cu no tin cuminda, hende cu no tin paña. Tambe a bishita paisnan cu Hesus y Mama Maria kier pa Vidente bishita pa plama e devocion di Hesus, nos Amigo y Salbador y La Birgen di Gracia di Aruba pa tur eternidad. Ademas cu Koyari ta nos lugar di refugio, e tereno bendiciona a duna hopi fruta bunita, entre otro sanacion, combercion, liberacion, transformacion, hende di otro religion ta comberti bek pa Catolico, siña nos stima, pordona, yena nos cu alegria, amor y guia nos. E tereno no tabata refugio di e fielnan Rubiano so, sino tambe di e stranheronan cu a bin di peregrinacion. Asina mes e grupo The Voice of Jesus a ricibi hopi bishitanan lokaal y di afo cu a bin busca nan refugio riba e tereno di Koyari, y mi por bisa cu hopi milager a pasa riba e tereno aki. Awor e tereno d Koyari ta cera, pasobra e donjonan a pidi e terreno bek. Dios ta amor, E ta Misericordioso, E ta stima tur su yiunan cu ta manso y humilde di curason. Awor mas cu nunca e grupo The Voice of Jesus, tin forsa y ta sigui den nomber di Hesus proclama e bon noticia pa esnan cu mas mester di dje. Loke ta di Dios ta sigui crece y ningun hende por caba cu ne, unda cu tin oracion Hesus ta memey di nan. Hesus ta luz di mundo y unda cu tin scuridad e Luz aki ta drenta.
Nos alma ta alegra, pasobra Christo no ta mara na un lugar so, e ta move y baila cu nos den tur su libertad y ketobay ta E Luz di Mundo cu ta drenta den e curasonnan cu ta invitele drenta, y duna nos bida, amor y mas sabiduria tur dia. Danki pa lesa e comunicado di prensa aki, skirbi pa un di e fielnan cu ta bishita Modanza. Danki Ruman Gilberto.
