Desde siman pasa Dr. Horacio E. Oduber Hospital ta re-anuda, poco poco, pero sigur su cuido regular. Tur pashent lo ser yama durante e proximo simannan pero ta pidi pa tene un poco di pashenshi mirando cu tin un lista di espera cu a aumenta. Durante e prome ola di COVID-19, a cera Hospital casi completo pero den e di dos ola a purba di mantene habri y sigui brinda mayoria di servicio. No tabata completamente exitoso, mirando cu mester a cancela operacionnan planea y por a sigui cu solamente operacionnan di emergencia. Motibo principal tabata subida di casonan di COVID-19 admiti den Hospital versus e capacidad limita di personal.
“Durante mas di un luna Hospital tabatin su mannan yen cu admicion di pashent cu COVID-19 riba pisonan di cuido regular y tambe Cuido Intensivo, Jacco Vroegop, director di Dr. Horacio E. Oduber Hospital, a duna di conoce. Tur profesional den HOH a traha duro pa asina brinda lo miho den cuido pa yuda tur cu mester di esaki y ta sumamente orguyoso di tur. Pero consecuentemente otro pashent mester a warda pa por ricibi cuido medico no urgente. E cuido regular a conoce cancelacionnan y esey a pone cu tin un lista largo di espera.
Como director di hospital, e ta pidi su disculpa pa esaki. E ta un situacion fastioso sabiendo cu mester yuda hende y no tabata por mirando e situacion di COVID-19 na HOH. P’esey p’e proximo lunanan lo hasi todo por todo pa baha e lista di espera y yuda tur cu mester. E siman tras di lomba a cuminsa bek cu e prome operacionnan planea, pues cambernan di operacion ta den funcion un biaha mas. Tur departamento ta funciona bek manera e tabata prome cu COVID-19 y ta spera cu esaki keda asina.
Locual si ta importante pa tur hende tene bon cuenta cune ta cu lo dura un tiki pa por yuda tur hende bek, pero Vroegop tin e speransa cu lo logra esey. E ta gradici ful e personal di hospital pero tambe habitantenan di Aruba p’e pasenshi y alabes di a sigui kere den nos. Ta importante pa hunto realisa cu COVID-19 simplemente no a bay, pero pa nos tur hunto sigui bring’e.
Hospital semper ta cla y lo purba yuda tur hende manera debe ser y mas lihe cu ta posibel. Pero tambe pa percura cu tur hende riba e isla por ta saludabel. Nos tin un compromiso cu Aruba y alabes ta spera cu tur hende por sigui mantene nan mes na e reglanan stipula pa minimalisa riesgo di contagio.
