Ta conoci cu e retonan na DIP ta grandi y ta mirando luz den horizonte. Prome Minister Evelyn Wever Croes ta duna di conoce cu e parti pa e personanan cu ta pidi tereno pa cas a logra cu DIP por duna 500 parcela cu por keda duna pa construccion di cas. Pronto e personanan riba e lista di espera lo wordo yama pa asina nan por ricibi nan tereno pa por construi nan cas.
Sinembargo mester por drecha e maneho cu tin actualmente. Segun prome minister Evelyn Wever Croes e minister prome cu su persona a pone un maneho hopi estricto pa hende haya tereno.
Un di e criterionan ta cu e persona mester tin 100 % financiamento di banco pa por haya un tereno di gobierno, sinembargo no ta tur hende ta haya e prestamo 100% . Tin personanan cu famia ta yuda nan tata of mama porehempel, of nan tin e deseo di construi nan cas riba nan propio forsa.
Tambe e maneho anterior ta bisa cu e ciudadano mester construi porlomenos 30% si haya e tereno. Ta puntonan y maneho cu DIP ta revisando e exigencianan aki y por lo pronto mester tuma un decision pa flexibilisa e maneho unda cu no mester tin 100% tipo di financiamento mas, pero si mester prueba cu tin e forsa pa traha e cas.
Tampoco no mester traha un cas grandi y por traha cas nan mas chikito tambe contal cu por yuda ciudadanonan cu tin mester pa haya nan vivienda. Actualmente DIP ta finalisando e maneho pa asina por anuncia pa e ora por trata e peticionnan pa e 500 terenonan cu tin disponibel cu por keda duna den un termino hopi corto.
Banda di e parti aki pa loke ta trata e vivienda social DIP no ta duna tereno pa vivienda social, pero FCCA si. Sinembargo FCCA tabatin diferente retonan pa ricibi financiamento nan abou, pero segun prome minister Evelyn Wever Croes danki cu awor tin espacio financiero den e presupuesto cu por duna e espacio aki na FCCA.
Segun Prome Minister Evelyn Wever Croes ta hopi importante cu a entrega e presupuesto 2025 na parlamento pa asina minister di finansas por aloca un fondo pa gobierno presta FCCA e fondo cu e tin mester na interes hopi abou pa asina por traha 100 cas social den e proximo lunanan tambe.
DIP su maneho ta dirigi riba vivienda, pues proyectonan cu ta acerca gobierno pa tereno , si e ta di vivienda e ta haya prioridad, segun prome minister Evelyn Wever Croes.
Sinembargo e proyectonan aki mester ta viviendanan cu e clase trahado, e clase media di Aruba por paga. Actualmente no ta interesa den vivienda hopi caro y of luhoso, pero nos mester di vivienda pa nos hendenan, pero tambe pa nos adultonan mayor. E inversionistanan cu ta interesa den inverti den un proyecto di adulto mayor cu ta casnan cu e adulto mayor por paga, ta proyectonan cu ta haya prioridad.
Tambe poco poco ta yegando na e tema di terenonan comercial cu ta keda haci hunto cu departamento di asuntonan economico y ta spera cu e aña aki por saca tur e opcionnan cu e keda pidi debi cu prome ta haya un optie y si por cumpli cu tur e condicionnan e ora ta haya e tereno. Prome Minister Evelyn Wever Croes ta kere cu pa fin di aña lo por mira hopi movecion den e parti aki.