Entrante otro siman nos lo por wak e Watertoren na Sanicolas den stelashi pa trabounan di mantencion. E proyecto di mantencion lo ta ehecuta pa GPS Construction N.V., Rotech N.V. y Hecon N.V. y lo tin un duracion di aproximadamente tres luna. E trabounan ta encera verfmento di exterior di e monumento completamente, instalacion di un ‘bliksem afleider’ y reparacion di algun murayanan parti paden di e edificio.
Durante e periodo di mantencion e Museum of Industry lo keda habri pa publico teniendo cuenta cu seguridad di tanto publico como e trahadornan.
Stichting Monumentenfonds Aruba tin un ‘meerjarenonderhoudsplan’ a base di cual ta traha pa mantene e monumentonan cu ta pertenece na e fundacion den bon condicion. Aparte di e trabounan cu ta inicia na oktober na San Nicolas tambe nos ta actualmente haciendo mantencion na Casita Geel y Huisje Wild. E trabounan na Weststraat 15 conoci manera Casita Geel ta pa adapta e edificio pa un huurdo nobo cual pronto nos lo anuncia.
SMFA ta gradeci Fundacion Museo Arubano pa e cooperacion pa asina por ehecuta e trabounan di mantencion.
Watertoren San Nicolas
Debi na e escases di awa na principio di siglo 20, Curaçao a establese un servicio pa suministracion di awa bou di e nomber Landwatervoorzieningsdienst (LWV). Na 1933 Aruba a desaroya su propio planta di destilacion di awa na Balashi y a crea su propio red di distribucion di awa. Pa soluciona e problema cu presion di awa durante e oranan di mas uzo a dicidi pa construi dos toren di awa. E toren na San Nicolas a keda inaugura dia 14 di augustus 1939 y esun di Oranjestad dia 4 di November 1939. E restauracion di e toren na San Nicolas a termina na 2013 y na 2016 Museum of Industry a habri su portanan den e toren na Bernhardstraat.
