Aunke cu e caso no tabata contra Embassy Suites by Hilton Resort Aruba, toch e
repercucionnan a afecta e hotel directamente. Na un forma delibera, Gobierno di Aruba a stroba
e proyecto door di tarda masha hopi den e proceso di otorgamento di e permisonan necesario y
hasta te awe, ainda no a caba di contesta peticionnan di permisonan solicita. Pero tres hues
den Corte di Apelacion a afirma cu e compania a cumpli cu tur e rekisitonan cu Gobierno di
Aruba a rekeri y cu e permiso di construccion otorga na nan tabata bon duna.
Asina mes, e desaroyador, Natura Development N.V. a keda babuca di lesa e comunicado di
prensa di Minister Ursell Arends den cual e ta acusa nan di a pretende di tin cierto inmunidad
contra nos leynan y a opone contra pidi ontheffing y a insisti cu esaki no ta conta pa nan. E
desaroyador no por compronde con un minister por gaña publicamente asina. Dia 18 di juli
2023 a entrega peticion pa ontheffing y te dia di awe, mas di un aña despues, ainda no por
ni haya contesta. A bay corte contra e minister y hues a ordena pa Minister Ursell Arends
tuma un decision den tres luna y atrobe el a keda sin cumpli cu e sentencia di hues. No por
kita for di e pensamento, sigur despues di lesa e comunicado di Minister Arends, cu e tin
algo personal contra e proyecto.
Natura Development ta kere den Aruba
E compania desaroyador tin bastante aña caba na Aruba y a desaroya mas cu un proyecto
grandi, di cual esun aki di Embassy Suies by Hilton Resort ta esun di mas grandi. Mara na un
inversion di 130 miyon dollar, financia pa banconan Mericano, ta demostra cu ta kere den
economia di Aruba. Hilton, un marca serio cu tin otro propiedad na Aruba caba tambe a
demostra nan confiansa pa maneha e hotel aki na Aruba. Awendia nan ta emplea mas di 200
empleado directo den servicio.
Pandemia a stroba e proyecto
Ta for di aña 2016 caba a start cu e preparacionnan y desde aña 2018 a trabounan di
construccion a cuminsa, planea pa a keda cla na aña 2021. Pero debi na pandemia y e
medidanan di distanciamento social, a stroba e proyecto y a tuma por lo menos dos aña mas pa
por a keda cla. Esaki, hunto cu aumento den prijsnan despues di pandemia, a pone cu e
proyecto a costa 130 miyon Dollar Mericano!
Victima di maneho nobo
E punto ta cu, na momento cu Gobierno di Aruba a otorg’e e permiso di construccion, a dun’e
permiso tambe pa traha un tunnel pa por yega na e beach cu a acorda. Tur tempo, e mesun
Minister di Infrastructura tabata Minister di Naturalesa tambe, pero a opta pa cambia esey na
aña 2021, ora cu a bin cambio den gobernacion. Y for di e momento ey e problemanan a
cuminsa, mara na tardansa of na no contesta peticionnan di e hotel.
E sentencia awo ta papia un idioma cla
E huesnan a skirbi den nan sentencia cu despues di evaluacion huridico, cu pa loke ta trata e
destinacion di “beach/strand” den e ROPV gobierno, a cumpli cu tur dos condicion di articulo
5.1. ora di a otorga e permiso na Natura Development. E rekisitonan ta cu e actividad ta cuadra
cu loke ta permiti pa ROPV y a cumpli tambe cu e di dos condicion cu ta cu no mag di causa
daño na naturaleza y balornan ecologico cu por ta presente eynan. Por lo tanto, Hof ta
considera cu a cumpli cu tur e condicionnan di articulo 5 di ROPV ora a duna Natura
Development e “aanlegvergunning” pa e area cu destinacion di beach.
Wardando contesta di Minister Arends pa un aña caba
Pero awor Natura Development N.V. ta wardando contesta riba su peticion di un aña pasa, di
dia 18 di juli 2023 pa un “ontheffing”. Den e proceso a bay corte y a haya un “bevel” di hues cu
ta ordena Minister Arends pa e tuma un decision den tres luna di tempo. E mandatario a scoge
pa ainda ignora e sentencia y e ordo cu el a haya di hues. Mientras cu dia 18 di juli 2023 a
entrega peticion, nunca a contesta, pa cual a entama un caso den corte pa urgi Gobierno di
Aruba pa cumpli. Dia 5 di juni 2024 hues a dicta cu e mester tuma un decision den un termino di
tres luna. Ta bayendo dos luna y ainda no tin decision. Un aña largo ta TRANCANDO inversion
y desaroyo cu daño financiero substancial.
No tin maneho pa “ontheffing”
E realidad ta cu na e momento aki ainda Gobierno di Aruba no tin un maneho vigente pa cu
ontheffing. Pues no tin maneho, no tin un Lb ham, no tin nada cu ta regula e proceso di
ontheffing, pues ta actuando a base di willekeur ora cu anteriormente e ontheffingnan tabata
wordo duna den un dia!
Un hende mester cubri e daño aki
Natura Development N.V. a pasa door di un proceso largo di wardamento y a sufri hopi perdida
di entrada. E hotel tabata haya bookings y ora puntra si tin beach y contesta cu no, mesora
tabata cancela e bookingnan. No ta trata di un ni dos, sino hopi. Esey a pone cu e hotel a core
den entradanan mas abou cu presupuesta, pa cual banconan a adapta e indice di interes. A
pone Gobierno di Aruba debidamente na altura di e desaroyonan aki, a suplica pa ayudo y
atencion, pero cartanan a keda sin contesta y solucion. Aruba Birdlife Conservation, cu a bisa e
desaroyador personalmente den su cara cu e lo laga cer’e den prison, demostrando cu e tin
algo personal contra e proyecto, no por djis perde e caso y cla. Awo cu ta demostra cu tur esaki
tabata haci pa stroba e proyecto y purba perhudica e pan di cada dia di mas di 200 empleado,
lo cana e caminda di demanda daño y perhuicio for di Minister Ursell Arends y for di Aruba
Birdlife Conservation.
Tocante Embassy by Hilton
Embassy by Hilton, ta un di e 18 marcanan lider den e mercado di Hilton, cu ta dedica na ofrece
loke ta mas importante pa e biahero. Servicio completo, accesibel y exclusivo ta loke e marca ta
ofrece na biahero di placer y pa negoshi. Embassy Suites by Hilton ta number un den su clase,
cu ta ofrece two-room suites, free made-to-order breakfast, open atrium, 24-hour fitness centers
y complimentary evening reception. Embassy Suites by Hilton tin mas di 260 hotel y 42
propiedad den desaroyo.
Tocante Embassy Suites by Hilton Aruba Resort
E compleho di construccion nobo di 8 piso y 300+ suites na Aruba, ta conta cu suitenan
espacioso y exclusivo di Embassy Suites by Hilton, ekipa cu un sala apart, un camber priva y
un minibar cu microwave, minifridge y koffiepot. E compleho ta brinda un espacio flexibel pa
reunion di 6 mil pia cuadra, un spa di mas di 3000 pia cuadra, piscina den aire liber, un gym y
casino, cu lo habri dentro di algun tempo mas. E hotel nobo ta ofrece un restaurant exclusivo,
un bar y opcion di un grab-and-go dining pa un snack lihe. Huespednan tambe ta disfruta di
servicionan exclusivo, cu ta inclui desayuno di cortesia prepara na bo gusto y recepcion anochi
cu snacks y bebida.
E proyecto di Aruba, contrario na mayoria otro proyecto di Embassy Suites cu normalmente nos
conoce, ta forma parti di un liña nobo den e categoria luhoso cu ta e proyectonan “resorts”.
Aruba ta di 6 proyecto den e categoria high end aki di Hilton, cu a introduci Embassy Suites
Beach Resort, distinguiendo e asina di e Embassy Suites Hotel. Doño di e edificio ta Natura
Development NV, cu a cera un acuerdo di operacion cu Hilton. E edificio di 300+ suite
oceanfront Embassy Suites by Hilton Aruba Resort, ta marca e di dos hotel di Hilton riba nos
isla y ta reenforsa e plannan continuo di expansion di e compania den Caribe.
Ta for di aña 2016 caba a start cu preparacionnan y desde 2018 e trabounan di construccion a
cuminsa, planea pa a keda cla na 2021. Pero debi na pandemia y e medidanan di
distanciamento social, a stroba e proyecto y a tuma por lo menos dos aña mas pa por a keda
cla.
