Lisette Malmberg: “Bida den Comunidad”

Kico kemen pa biba den un comunidad berdadero, si comunidadnan ta consisti di asina tanto diversidad di hende, opinionnan, creencianan, puntonan di bista, y perspectivanan?

Con nos por crea un cultura den e diversidad aki cu ta inclusivo, pero toch ta provee espacio pa e expresion di e creencia di cada persona sin ataca, menosprecia, intimida, of huzga?

Mi a tuma nota di e discusion cu ta un punto central di friccion den e dianan aki, cual ta e caso di matrimonio di mesun sexo. Ambos banda di e caso tin creencianan fuerte, y conviccionnan di bida y a demostra esaki cu hopi pasion den diferente maneranan den nos Medionan di Prensa y Medionan Social, diferente biaha bayendo bek na acusacionnan personal, atakenan y esun brongosando e otro.  E forma cu nos ta comportando y comunicando ta bisa hopi mas di nos como persona, cu di e tema den cuestion.  Aunke cu e situacion aki ta uno complica, cada banda tin derechonan legal cu mester wordo respeta.  

Locual no ta aceptabel, ta e manera cu nos ta deshonra otro den e proceso di e expresion di nos creencianan. Na e momento cu nos enfoke ta pa “gana” un argumento of pa tin “rason” sin considera kico e lo costa, nos TUR ta perde, pasobra relacionnan ta kibra, nos comunidad ta polarisa y dividi y nos ta perde bista for di e Ley di Oro, cual ta pa nos trata otro manera nos kier wordo trata, of e Gran Mandamento cual ta urgi nos pa stima otro manera nos ta stima nos mes. 

Mi speransa di mas ferviente ta pa nos por yega na un luga di madurez como sociedad caminda nos por respetuosamente ta di acuerdo pa ta den desacuerdo, mientras nos ta reconoce e dignidad di cada persona den e manera cu nos ta comunica cu, y tocante otro.

Nos ta aki hunto riba e pida baranca cu yama Aruba, pa crea un hogar pa nos tur, un luga safe, un luga caminda nos por pertenece, un luga caminda nos por biba y prospera na paz. 

Aruba, nos por y mester haci miho. Nos yiunan ta mirando y siñando… Laga nos pone un ehempel di liderasgo den gracia y humildad cu ta siña nan kico e kemen pa biba den comunidad y pa TA un comunidad.