Na Parlamento di Aruba tin un proposicion di ley pa haci matrimonio entre personan di mesun sexo legal. Raad van Advies a conseha Parlamento pa legalisa matrimonio di mesun sexo. Corte Superior na Hulanda dia 10 di november proximo lo cuminsa evalua e decision di Corte di Apelacion cu a instrui gobierno di Aruba pa legalisa matrimonio di mesun sexo. Di otro banda lidernan religioso di Aruba a cuminsa un accion di firma contra esaki na december 2022.
Palabra final
Ni Raad van Advies ni Corte Superior mester tin e ultimo palabra den un asunto di moralidad pa nos pueblo. Matrimonio pa personanan di mesun no ta un derecho segun Corte Europeo pa Derecho Humano. Pa e motibo aki Aruba no ta obliga di legalisa matrimonio di mesun sexo. Palabra final ta den man di pueblo di Aruba. Diesocho mil hende aki na Aruba mediante e accion di firma a duna di conoce cu nan kier mantene matrimonio den nos codigo civil manera cu e ta na momento aki, esta entre un homber y un muhe.
Peliger pa nos muchanan
Apesar cu e lobby lgbtq+ ta bisa cu e ley aki no ta toca nos muchanan, nos ta mira cu den ideologia y den practica nan ta influencia mente di nos muchanan pa considera homsexualidad algo normal. Nos ta corda cu algun luna pasa mayoranan a lanta protesta contra scolnan basico caminda contrario na e curiculo existente algun maestro tabata promove homosexualidad bou nan alumnonan. Danki Dios e mayornan alerto aki a habri wowo di pueblo di Aruba pa e realidad aki. Si Parlamento di Aruba legalisa matrimonio di mesun sexo nan ta legalisa di biaha e derecho pa scol siña nos muchanan cu homosexualidad ta normal. Actualmente esaki ta tuma luga caba na Canada y otro pasinan na un manera cu ta hopi vulgar y nos kier proteha nos muchanan contra di esaki.
Marcha pro famia
Diabierna dia 3 di november lidernan religioso lo entrega e diesocho mil firmanan pro matrimonio original na nos gobernantenan den un marcha pro famia. Tur ciudadano cu kier proteha nos muchanan contra e ideologia lgbtq+ y mantene famia original ta bon bini pa uni na e marcha aki. Pa e marcha aki ta cuminsa prepara dilanti di edificio di ex DOW den Paardenbaaistraat pa 5’or di atardi.
