Pueblo ya a custuma cu gobierno MEPPORRED ta colma di problema, colma di hendenan cu ta sirbi nan propio interes prome cu nan sirbi interes di pueblo y for di Juli te cu awe, tin cantidad di casonan cu ta mustra realmente cu no tin seriedad den e gobierno actual.
Melvin Tromp di partido AVP a mustra durante conferencia di prensa di partido AVP, cu no ta pasa un siman cu algo robes a bay malo cu e gobierno aki, dirigi pa Prome Minister Evelyn Wever Croes.
“Mi por cuminsa mustra cu dia 30 di juli fraccion di lidernan di fraccionnan den Parlamento cu ta sostene gobierno, esta Rocco Tjon di MEP, Dianira Maduro di POR y Ricardo Croes di RED, a presenta mocion di desconfiansa contra Minister Marisol, un mocion cu a wordo fabrica den un fin di siman.
Sinembargo ora cu Minister Lopez Tromp a informa parlamento durante tratamento di e mocion di desconfiansa contra su persona, di e maneho corupto di un ex Minister y acusando otro ministernan di gabinete Wever Croes actual di ta complice na actonan corupto, Prome Minister Evelyn Wever Croes, a manda para e reunion aki, ordenando parlamentarionan cu tin como tarea pa controla gobierno, pa asina e por dialoga cu Marisol.
Algun dia despues Prome Minister a anuncia cu a yega na un consensus cu Mariol, a yega na palabracionan pa por traha hunto pero e menasa riba cabes di algun minister pa corupcion, a sigui colga, caminda Marisol a entrega keho na autoridadnan hudicial.
Dia 15 di oktober a trata ley di tiramento di pisca sin cu tabata mester ya cu manera palabra cu Parlamento, e tres Ministernan concerni, a yega na un acuerdo pa introduci un gedoogd beleid y a bay parlamento pa participa e acuerdo aki.
Durante di e reunion aki ‘from nowhere,’ a presenta e di dos mocion di desconfiansa contra Marisol, presenta pa lider di fraccion di MEP, a pone e mocion aki na votacion di cual Presidente Ady Thijsen a cualifica como votacion legal, apesar cu ta solamente 10 voto tabata na fabor di esaki y na un momento cu no tabatin quorum pa falta di suficiente parlamentario den sala y edificio, manera reglanan di ordo ta prescribi.
Un dia despues Gobernador a yama Presidente di Parlamento pa splicacion pero el a insisti cu politica por ta cruel y a insisti cu e tin rason y cu e mocion pa baha e Minister ta legal y como tal Marisol a wordo baha pa Parlamento.
Lider di partido RED den declaracion duna na medionan di comunicacion, a bisa cu su partnernan den coalicion a actua contra constitucion, contre reglanan y cu su persona no tin problema cu minister Marisol. Hasta dado momento Ricardo Croes prome di a bandona sala di reunion, a pidi Presidente pa corda conta cabes.
Despues di esey y cantidad di critica contra di su persona for di propio seno di e coalicion, lider di RED a acusa gobierno publicamente, di tin edificio di Cocolishi yena cu ‘friends and family,’ cu tin ministernan di e actual gabinete cu e ta sostene, bou di investigacion pa a corupcion.
Awor algun dia despues Prome Minister ta dirigi un carta na Gobernado pa informa gobernado, cu tanto Conseho di Minister y Comision Central di Parlamento, sin paricipacion di AVP, a sigura cu nan no por sigui traha cu Minister Marisol y cu no tin un ‘werkbare situatie’ mas cu e Minister.
Despues di tur esaki, e ciudadano Jan de Ruyter den un declaracion na prensa den Wilhelmina Park, ta acusa gobierno di corupcion, tanto pa loke ta otorgamento di tereno y hasta a lansa acusacion serio den direccion di yiu di Prome Minister cu lo ta deal den tereno.
E drama aki di gabinete Wever Croes, a sigui cu Prome Minister durante tratamento di presupuesto supletorio, informando cu su persona y su yiu a entrega keho di difamacion contra di Jan de Ruyter rapidamente pero por a nota cu e mandatario no tabatin mesun ansiedad pa denuncia y suspende su ministernan cu ta bou di investigacion.
E siguiente capitulo di e drama politico aki a sigui caminda na triple A tin retironan ta cay, a manda hende cas pero na mes momento ta sali na cla cu yiu di Prome Minister, no ta un di esunnan cu a haya carta di retiro y kende tin menos aña di servicio cu algun trahado cu hopi aña di servicio y cu ta wordo manda cas.
Pa completa obra, dianan despues ta bin resulta cu lider di RED, Ricardo Croes tambe tin un yiu cu a drenta servicio di triple A e aña aki y tampoco ta riba lista pa wordo retira.
Pa e motibo aki tambe awor pueblo por compronde di con Ricardo ta usa su mes manera un boter di lijm pa e gobierno aki, un gobierno cu ta cuestiona y critica, pero caminda awor ta bin Sali na cla cu e tambe a haya pida bolo pa come y como tal e lo sigui lijm e gobierno aki y por haci loke cu e kier ya cu gabinete Wever Croes cu 9 asiento den Parlamento, ta resulta di ta den minoria cu un solo asiento di partido RED,” Melvin Tromp di AVP a declara.
