Lider di Partido POR, Alan Howell despues di un reunion importante den Parlamento a duna su comentario riba esaki y su posicion pa loke ta trata sosten of boycott na Gobierno.
El a bisa cu e reunion tabata riba e plannan di Gobierno pa wak con lo sigui cu e ayudo di cuminda ‘voedselpakket’. Hulanda a brinda un ayudo hopi grandi pa cu esaki a traves di Cruz Cora di Aruba, pero lamentablemente e ta yega na un fin y Gobierno di Hulanda a pidi Gobierno di Aruba pa den luna di maart nan tin un plan di con Pais Aruba lo continua cu e ayudo aki pa cu e personanan cu mester di dje.
Howell a cataloga e reunion como sumamente exitoso unda tabata presente Gobierno, Rampenbestrijding, Departamento di Asuntonan Social y Fundacion pa Nos Comunidad. Nan tur a splica con nan a experienca e situacion y unda tin cu sigui bay pa futuro pa sigura cu nos ciudadanonan tin cuminda y por sobrevivi.
Pa loke ta su situacion pa cu Gobierno, lider di POR a bisa cu e por a tuma nota cu tin hopi hende ta spera cu Alan Howell y Partido POR lo bay boicotea Gobierno pa tur loke a sosode, “awe mi kier pone esaki bon cla, Alan Howell y Partido POR tey na bienestar di Pais Aruba, Alan Howell no tin tempo pa comporta den forma rencoroso pa loke a pasa, e cosnan ey nos ta laga den man di Dios. Como parlamentario e ta mi deber pa para na bienestar general y muy en especial den e situacion aki, sigura como representante di pueblo cu nos ciudadanonan por sigui sobrevivi y pa nos ciudadanonan por sigui tin cuminda riba mesa”.
Seguidamente el a informa cu den transcurso di dia lo tabatin un reunion di comision central pa tende e sentimentonan di e fraccionnan pa loke ta e paketenan di cuminda. Howell a conta cu Gobierno a propone na prome instante 4.2 miyon pa 1-2 luna, pero aworaki Gobierno demisionario a bin cu otro plan caminda nan ta pidiendo pa scucha e sentimentonan di e parlamentnarionan riba e suma di 14.2 miyon, pasobra nan ta pensa cu ta miho pa rek e lunanan y no acudi cada biaha na Parlamento pa pidi placa atrobe pa e personanan por haya cuminda riba mesa.
“Pueblo por ta sigur den Alan Howell y Partido POR. Nos si sa con pa separa loke ta politica y separa loke ta pueblo y su bienestar. Nos no tin tempo pa ta rencoroso ni pa boicotea Gobierno. Loke nos ta para pe firme ta e bienestar di nos ciudadanonan y nos tin cu zorg pa nos ciudadanonan tin manera pa come y sobrevivi den e tempo aki”, Alan Howell a expresa.
Na final el a gradici tur esnan cu ta traha como voluntario na Cruz Cora y Fundacion pa Nos Comunidad cu a percura pa nos ciudadanonan por a yega na e comestiblenan. Tambe el a gradici tur e comerciantenan cu tambe a contribui pa nos ciudadanonan por sobrevivi. “Mi ta desea pa cada famia cu ta pasando den momentonan dificil pa mas lihe posibel cu poder di Dios sali for di dje. Mi ta desea tambe pa e siguiente Gobierno sigui traha pa nos pais por saca su cabes riba awa atrobe y den mi persona y tur otro candidato riba lista di POR, pueblo por ta sigur cu nan lo tin representanenan cu sa con pa separa politica di bienestar di pueblo”.