Inmediatamente despues di e declaracion di mr. Gerlien Croes como parlamentario independiente, lider di Partido di Pueblo Arubano (AVP), mr. Mike Eman a duna su reaccion indicando cu e decision di e hoben politico ta uno doloroso pa su organisacion, pero na mesun momento ta ripara un sentimento mas fuerte di coleganan pa salba pais Aruba di e situacion y maneho actual. E lider politico a demostra resignacion y respet pa e posicion cu Croes a tuma, sigurando cu e esfuersonan pa renobacion den AVP lo continua pasobra tin mas hende cu gana defende nos isla.
Eman a admiti cu no tabata desea di perde un bon miembro di partido y cu ta un momento cu sigur partido kier a evita. Sinembargo ta sinti cu a inverti suficiente tempo den combersacion na diferente nivel cu esunnan directamente envolvi, pero tambe pa medio di otro canalnan. Mas aleu, e lider di AVP a indica cu ta sigur lamentabel mirando cu Gerlien Croes ta bin di un famia cu ta un troncon di partido, for di unda ta bin candidato manera Freddy Croes y ex parlamentario Duke Croes.
“Awe mi ta para aki pa expresa respet pa decision cu e persona a tuma. Ami ta un di e poco politico cu na momento asina no tin nada di bisa di esunnan cu por tin division cu ne. Esey ta un ehempel di politica nobo, mescos cu ora ta drenta gobierno no ta persigui ningun hende,” asina Eman a declara dialuna mainta pafo di edificio di parlamento na medionan di comunicacion, enfatisando cu renobacion ta un parti inherente di e liderazgo di e partido.
Esey ta un proceso cu ya caba tabata aden y awo lo continua, e lider di AVP a bisa. E prueba ta hustamente e responsabilidad di liderazgo cu na hopi ocasion y plataforma tanto di partido, fraccion; na Aruba y den exterior a duna Gerlien Croes. Tabata mi’re como un futuro dirigente. Eman: “A haci un esfuerso pa duna un bos na esunnan cu kisas tin un perspectiva diferente. E no a resulta. AVP tin un responsabilidad mas grandi awo pa traha hunto riba e vision pa salba e pais di e direccion robes.”
E lider di AVP ta sinti cerca hopi activista un compromiso renoba pa fortifica y sali fuerte dilanti atrobe. E forsa di e partido no ta Mike Eman of un candidato, pero e pueblo cu for di San Nicolas pasando den Santa Cruz y Tanki Leendert y tur skina, kier libra di e gobierno aki. Y si tin un partido cu ta un protector di nos comunidad pa tur loke ta bay robes y cu tin e ingrediente pa presenta un plan di solucion, esey ta partido AVP.
Historia ta mustra cu cada bes cu AVP a pasa den momento di reto, e partido ta haya e forsa y ta sali mas fuerte bek. “Esaki ta e partido na aña 1986 a rescata e pais y mescos na 1994. Na 2017 a entrega un pais totalmente renoba. Eman tin confiansa cu esey ta un sentimento cu ta toca tur generacion.
1 comment
[…] Source link […]