E di dos dia di reunion cu gobernador di Aruba Lider di AVP Mike Eman tabata e di prome cu lo mester a reuni cu gobernado. Lider di AVP ta gradici e comunidad di Aruba pa e sosten cu partido AVP a ricibi durante di eleccion.
Segun Eman e tabata un eleccion cu hopi reto, pero e candidatonan y activistanan a traha duro y por bisa cu awe partido AVP un bes mas a supera den momentonan di hopi reto y pone un posicion hopi cla pa forma parti di e Gobernacion di e pais Aruba, pero tambe forma parti di e proceso politico importante cu Aruba ta den espera di dje.
Partido AVP a prepara su mes grandemente pa por tin e capacidad den cas pa por maneha e retonan grandi cu Aruba ta para dilanti di dje y a prepara un plan den consulta cu comunidad y awe 29 di juni 2021 a comparti cu gobernador cu ta mira cu partido AVP por forma parti di un gobierno cu e partidonan cu a mira como partidonan nobo cu a haya asiento den parlamento. Ta trata aki di partido RAIZ, MAS y Accion 21.
Lider di AVP Mike Eman ta kere cu partido AVP y e partidonan chikito a para pa un cambio, un cambio di e Gobernacion cu tabatin ultimamente. Segun lider di AVP cada un di e lider nan a articula cu mester bin un cambio cu mester cambia e direccion di e pais unda cu enseñansa mester di sosten , salubridad publico no mag di bira victima di e retonan cu e pais ta pasando aden.
Loke cu tambe tin mester ta dialogo den nos pais y tur cuater partido a articula e pensamento nan aki y tur cuater partido tabatin hopi preocupacion cu a maneho di friends and family di ultimo añanan caminda cu hopi placa di nos comunidad enbes di keda inverti den enseñansa, salubridad publico y mehoracion social no tabata bay den e direccion aki.
Segun Lider di AVP Mike Eman riba e puntonan aki recuperacion economico,cambio di direccion politico y dialogo den nos pais unda cu ta duna prioridad na nos economia tin hopi paralelo entre partido AVP y e partidonan cu a saca nan mes den e eleccion aki.
E mensahe di cambio tabatin un acogida amplio den comunidad. Por bisa cu for di e 12 asiento esunnan cu a pidi pa un cambio di direccion na Aruba ta esunnan cu a pone nan confiansa den partido AVP y RAIZ ,MAS y accion 21 y aki sigur ta mira e posibilidad pa forma un gobierno.
Lider di partido AVP ta kere cu gobernador por scoge pa forma dos informador, uno cu ta explora e posibilidad di partido MEP y partidonan chikito y si e partidonan chikito ta desea esey y e otro ta un informador cu ta explora e posibilidad di un gabinete AVP, RAIZ, MAS Y Accion 21.
Esaki ta un di e puntonan cu a comparti cu gobernador mirando cu tin un urgencia pa tin un gobierno nobo unda cu tin cu cambia e direccion y drenta den dialogo cu Hulanda unda cu tin hopi tema cu si nos no yega na dialogo constructivo cu Hulanda ta keda puntonan di dolor.
Segun lider di AVP na e momentonan aki ta colga riba cabes di gobierno di Aruba cu mester corta 60 miyon den salubridad publico esey lo kiermen eigenbijdrage y kita remedi atrobe. Sinembargo lider di AVP ta kere cu e temanan aki mester bay bek Hulanda pa asina atende cu nan, pero e gobierno di signatura di partido MEP a practicamente acorda e temanan aki caba unda cu mas sufrimento ta bay tin pa pueblo si Aruba sigui den e direccion di e gobierno di signatura di partido MEP. Aruba no lo haya e cambio pa cual cu e la vota dia 25 di juni. Lider di AVP tabatin comunicacion cu e partidonan chikito pa asina sondia posibilidadnan, pero no a sinta oficial ainda. Sinembargo loke cu por scucha rond ta sinti cu lo ta habri pero no tabatin reunionnan oficial. Pa loke ta trata partido MEP segun lider di AVP Mike Eman na momento cu MEP a exclui AVP no tin nada mas di papia.
