A anuncia awe cu lider di oposicion Venezolano, Edmundo González Urrutia, actualmente den exilio na Madrid, ta biaha pa Argentina. Esaki ta bini na momento cu autoridadnan Venezolano ta ofrece un premio di $100.000 pa informacion cu ta hiba na su detencion. E biahe di González ta tuma luga en medio di tension entre Venezuela y Argentina. E lider di oposicion ta bisa cu el a gana e eleccion di 28 di juli contra Nicolás Maduro y a priminti di bolbe Caracas dia 10 di januari pa “tomare poder” di Maduro. Sinembargo, segun González, e lo topa prome cu presidente argentino Javier Milei. Tambe el a yama e Venezolanonan pa reuni na e famoso Plaza di Mei den e capital di Argentina, Buenos Aires.
“Ta busca. Mandato di aresto. E premio: $100,000”, por lesa riba un poster cu e potret di González, comparti riba rednan social pa polis Venezolano. Segun fuentenan hudicial, e poster ta wordo distribui na aeropuerto y puesto di control den henter Venezuela. Na 20 di december di aña pasa, Spaña a duna González asilo politico. Ministerio Publico di Venezuela ta akus’é di crimen manera “conspiracion” y “asociacion criminal”. E conseho electoral Venezolano a declara Maduro reelegido pa un di tres termino di seis aña (2025-2031), sin divulga ningun detaye di e resultado di e eleccion. E oposicion ta bisa cu tin fraude den e eleccion y cu González a gana. Te na e momentonan aki ainda tin bringamento pa cu e posicion presidencia di Venezuela, pero mientrastanto e Pais ta keda bay atras pa politiconan y e pueblo ta esun cu ta sufri e consecuencianan. Dia 10 di januari nos dilanti lo tin hopi atencion riba Venezuela un biaha mas.